لاہور (اے بی این نیوز) محکمہ داخلہ پنجاب نے صوبے میں دفعہ 144 میں 7 روز کی توسیع کر دی۔ ترجمان محکمہ داخلہ پنجاب کے مطابق اس دوران ہر قسم کے احتجاج، مجالس، جلوس، ریلیوں، دھرنوں اور اجتماعات پر پابندی ہوگی۔
محکمہ داخلہ نے دفعہ 144 کے نفاذ میں جمعہ 24 اکتوبر تک توسیع کرتے ہوئے نوٹیفکیشن جاری کر دیا ہے۔عوامی آگاہی کے لیے دفعہ 144 کے نفاذ کی وسیع پیمانے پر تشہیر کرنے کی ہدایت کی گئی ہے۔
ترجمان محکمہ داخلہ کا کہنا ہے کہ دفعہ 144 کے تحت عوامی مقامات پر 4 یا اس سے زائد افراد کے اکٹھے ہونے پر مکمل پابندی ہوگی، پنجاب بھر میں ہر قسم کے اسلحے کی نمائش پر مکمل پابندی عائد کردی گئی ہے۔
ترجمان کے مطابق دفعہ 144 کے تحت صوبے میں لاؤڈ سپیکر کے استعمال پر بھی مکمل پابندی ہے، اشتعال انگیز، نفرت انگیز یا فرقہ وارانہ مواد کی اشاعت اور تقسیم پر مکمل پابندی ہوگی۔
کابینہ کمیٹی برائے امن و امان نے دفعہ 144 کے نفاذ کی مدت میں توسیع کی سفارش کی ہے، دفعہ 144 کے نفاذ میں توسیع کا فیصلہ امن و امان برقرار رکھنے، انسانی جان و مال کے تحفظ کے لیے کیا گیا ہے۔ پنجاب حکومت نے دہشت گردی اور امن عامہ کے خدشات کے پیش نظر احکامات جاری کئے۔
محکمہ داخلہ پنجاب کے ترجمان کا کہنا ہے کہ پابندی کا اطلاق شادی بیاہ، جنازوں اور تدفین پر نہیں ہوگا۔ سرکاری ڈیوٹیوں اور عدالتوں پر موجود افسران و اہلکار پابندی سے مستثنیٰ ہیں۔ لاؤڈ سپیکر صرف اذان اور جمعہ کے خطبہ کے لیے استعمال کیے جا سکتے ہیں۔
ترجمان محکمہ داخلہ پنجاب کا یہ بھی کہنا ہے کہ سیکیورٹی خطرات کے پیش نظر عوامی جلوس اور دھرنے دہشت گردوں کے لیے سافٹ ٹارگٹ ہو سکتے ہیں اور بدنیت عناصر اپنے مذموم عزائم کی تکمیل کے لیے ریاست مخالف سرگرمیاں کر سکتے ہیں۔
مزید پڑھیں:افغان طالبان سے مذاکرات: وزیر دفاع خواجہ آصف کی قیادت میں پاکستانی وفد دوحہ پہنچ گیا
