اسلام آباد (اے بی این نیوز) وفاقی وزیر داخلہ سینیٹر محسن نقوی نے طالبہ لائبہ کے والدین سے تعزیت کے بعد کہا ہے کہ یہ معاملہ حکومت اور پولیس کے لیے ٹیسٹ کیس ہے، ملزم کو جلد گرفتار کرکے سزا دلوائی جائے گی۔
اسلام آباد میں میڈیا سے گفتگو کرتے ہوئے محسن نقوی نے کہا کہ واقعے میں ملوث افراد کو کیفرِ کردار تک پہنچایا جائے گا۔ وزیراعظم نے بھی کیس کا نوٹس لیتے ہوئے ملزم کی گرفتاری کی ہدایت کی ہے۔
وزیراعظم محمد شہباز شریف کا اسلام آباد میں انٹرنیشنل اسلامک یونیورسٹی کی طالبہ لائبہ اعجاز کی خود کشی کا نوٹس، وزیرِ اعظم نے کہا کہ نوجوان طالبہ کی خود کشی انتہائی افسوس ناک واقعہ ہے.
وزیراعظم نے آئی جی اسلام آباد اور چیف کمشنر کو مرحومہ کے ساتھ فراڈ کرنے والے ملزم کو فوری طور پر حراست میں لینے کی ہدایت کرتے ہوئے کہا ہے کہ ملزم کو فوری طور پر گرفتار کر کے اسے قانون کے مطابق قرار واقعی سزا دی جائے گی.
— Prime Minister’s Office (@PakPMO) October 10, 2026
وزیر داخلہ کا کہنا تھا کہ ان شاء اللہ ایسے کرداروں کو قانون کے مطابق سزا دلوانے کی کوشش کی جائے گی، جبکہ ایسے ایجنٹس کے خلاف بھی بھرپور کارروائی کی جائے گی۔
وفاقی وزیر داخلہ محسن نقوی اور وزیر مملکت طلال چوہدری کی جی 10 میں متوفیہ طالبہ لائبہ کی رہائش گاہ آمد
وفاقی وزیرداخلہ اور وزیر مملکت کی طالبہ لائبہ کے والد اور اہل خانہ سے ملاقات، المناک واقعہ پر گہرے دکھ اور افسوس کا اظہار https://t.co/XzNZvvYN5k— Ministry of Interior GoP (@MOIofficialGoP) October 10, 2026
محسن نقوی نے بتایا کہ وفاقی تحقیقاتی ادارہ (ایف آئی اے) بھی کیس کی تفتیش کر رہا ہے۔ انہوں نے کہا کہ یورپی یونین نے تسلیم کیا ہے کہ ویزا فراڈ میں کمی آئی ہے۔
وزیر داخلہ کے مطابق نیشنل سائبر کرائم انویسٹی گیشن ایجنسی (این سی سی آئی اے) بھی کام کر رہی ہے اور پنجاب میں اس کے 61 ملازمین فرائض انجام دے رہے ہیں۔
محسن نقوی نے مزید کہا کہ حکومتی اقدامات کے نتیجے میں انسانی اسمگلنگ میں کمی آئی ہے۔ ایسے کیسز سے متعلق شکایات کو پاک آئی ڈی کے ذریعے درج کرانے کا نظام بھی متعارف کرایا جا رہا ہے۔
انہوں نے بتایا کہ کچھ دیر قبل وزیراعظم نے بھی اس کیس کے حوالے سے متعلقہ حکام کو طلب کرکے معاملے پر توجہ دی ہے۔
مزید پڑھیں:ڈی جی الیکشن کمیشن شمشاد خان فائرنگ سے شہید، افسوسناک خبر آگئی
