اسلام آباد( اے بی این نیوز   )وزیراعظم محمد شہباز شریف نے بدھ کو ازبکستان کے صدر شوکت مرزیوئیف سے ٹیلی فونک رابطہ کیا۔دونوں رہنماؤں نے علاقائی ترقی کو تیز کرنے کے امکانات پر تبادلہ خیال کیا اور توانائی، رابطے، زراعت، آئی ٹی، ٹیکسٹائل اور لاجسٹکس کے شعبوں میں دوطرفہ تعاون کو مزید وسعت دینے پر اتفاق کیا۔وزیر اعظم آفس کے میڈیا ونگ سے جاری بیان کے مطابق اس دوران وزیر اعظم شہباز شریف نے ازبک صدر کو 9 جولائی 2023 کو ہونے والے صدارتی انتخابات میں دوبارہ منتخب ہونے پر مبارکباد دی۔وزیر اعظم نے صدر مرزیوئیف کے دوبارہ منتخب ہونے کو ازبک عوام کے ان کی قیادت پر اعتماد کا اعادہ قرار دیتے ہوئے اپنے اس پختہ اعتماد کا اظہار کیا کہ ان کی قیادت میں دونوں ممالک کے درمیان دوطرفہ تعلقات مضبوط ہوتے رہیں گے۔وزیراعظم نے ازبکستان کے ساتھ دوطرفہ تعلقات کی پاکستان کے لئے اہمیت پر زور دیتے ہوئے ترجیحی تجارتی معاہدے اور ازبکستان۔پاکستان ٹرانزٹ ٹریڈ ایگریمنٹ کے آپریشنل ہونے پر اطمینان کا اظہار کیا۔انہوں نے کہا کہ یہ دونوں معاہدے دونوں ممالک کے درمیان اقتصادی اور تجارتی تعلقات کو فروغ دیں گے۔سمرقند اور آستانہ میں اپنی سابقہ ​​بات چیت کو یاد کرتے ہوئے، دونوں رہنماؤں نے علاقائی ترقی کو تیز کرنے کے امکانات پر تبادلہ خیال کیا اور توانائی، روابط ، زراعت، آئی ٹی، ٹیکسٹائل اور لاجسٹکس کے شعبوں میں دوطرفہ تعاون کو مزید وسعت دینے کی ضرورت پر اتفاق کیا۔