بیلا روس (اے بی این نیوز)وزیراعظم محمد شہباز شریف نے بیلاروس کے اپنے حالیہ دورے کے بعد پاکستان کے ہنرمند نوجوانوں کیلئے بڑی خوشخبری کا اعلان کردیا۔ایسوسی ایٹڈ پریس آف پاکستان (اے پی) کے مطابق وزیراعظم نے کہا ہے کہ بیلاروس نے ڈیڑھ لاکھ ہنر مند پاکستانیوں کو ملازمتیں دینے کا اعلان کیا ہے۔
انہوں نے اس اعلان کو بیلاروس کی جانب سے پاکستانیوں کیلئے ایک تحفہ قرار دیتے ہوئے کہا کہ اس سے ناصرف بیلاروس کی معیشت کو فائدہ ہوگا بلکہ باہنر پاکستانی نوجوانوں کو باعزت روزگار کے مواقع بھی میسر آئیں گے۔بیلاروس کے صدر الیگزینڈر لوکاشینکو کے ہمراہ پریس کانفرنس کرتے ہوئے وزیراعظم شہباز شریف کا کہنا تھا کہ پاکستان سے یہ باصلاحیت افرادی قوت، جنہیں بین الاقوامی اور ملکی معیار کے مطابق سرٹیفائیڈ کیا جائے گا، بیلاروس کیلئے قیمتی اثاثہ ثابت ہوگی۔
وزیراعظم کے دورۂ بیلاروس کے دوران دونوں ممالک کے وفود نے زراعت اور دفاع سمیت مختلف شعبوں میں تعاون اور تجارت بڑھانے پر بھی اتفاق کیا۔بیلا روس کے صدر لوکا شینکو نے پاکستانی وزیراعظم کے دورہ بیلاروس پر ان کا خیرمقدم کرتے ہوئے کہا کہ بیلا روس پاکستان کے ساتھ تعلقات کو بہت اہمیت دیتا ہے۔ دونوں ممالک کے مابین مختلف شعبوں میں تعاون کے وسیع مواقع موجود ہیں۔ انہوں نے کہا کہ پاکستان بیلا روس بزنس فورم کا انعقاد تجارت کے فروغ کے لیے اہمیت کا حامل ہے۔
وزیراعظم شہباز شریف کے دورۂ بیلاروس کے دوران دونوں ممالک کے درمیان 5 معاہدوں اور 2 مفاہمت کی یادداشتوں پر دستخط ہوئے۔ معاہدوں اور ایم او یوز پر دستخط کی تقری بیلا روس کے صدارتی محل میں سجی، جس میں وزیراعظم اور بیلاروس کے صدر نے بھی شرکت کی۔
مزید پڑھیں: امریکہ اس بھول میں نہ رہے کہ ٹیکس عائد کرکے چین کو جھکا لے گا،شی چنگ پنگ
