مین ہٹن(نیوزڈیسک) سابق امریکی صدر ڈونلڈ ٹرمپ کے مقدمے کی نگرانی کرنے والے نیویارک شہر کے جج کو جان سے مارنے کی دھمکیاں موصول ہوئی ہیں، جس کے بعد ان کی سکیورٹی بڑھا دی گئی ۔مین ہٹن سپریم کورٹ کے جسٹس جوآن مرشان کے خلاف دھمکیاں تقریباً ایک ہفتہ قبل شروع ہوئی تھیں، ڈونلڈ ٹرمپ کی جانب سے جعلی کاروباری ریکارڈز کے 34 سنگین الزامات کے بعد دھمکیوں میں اضافہ ہوا۔ٹرمپ مجرمانہ الزامات کا سامنا کرنے والے پہلے سابق امریکی صدر بن گئے ۔کورٹ ایڈمنسٹریشن آفس کے ترجمان لوسیئن شالفن نے فاکس نیوز کو بتایا کہ “چیمبرز کو متوقع اسپام اور ہتک آمیز کالز اور ای میلز موصول ہوئی جن کا جائزہ لیا جا رہا ہے۔”انہوں نے مزید کہا کہ “گذشتہ ہفتوں کے دوران سکیورٹی خدشات اور ممکنہ خطرات کا جائزہ لینا جاری رکھا اور عدالتوں اور اس کے آس پاس سکیورٹی کی موجودگی کو برقرار رکھا ہے۔ قانون نافذ کرنے والے ایک ذریعے نے بتایا کہ بڑھتے ہوئے خطرات کی روشنی میں نیویارک پولیس فی الحال اس بات کا جائزہ لے رہی ہے کہ آیا جج کے گھر کے باہر سکیورٹی دی جائے یا نہیں۔ذرائع نے مزید کہا کہ مرشان خاندان کی حفاظت کے لیے کوئی عدالتی سکیورٹی اہلکار تعینات نہیں کیا جا سکتا، تاہم نیویارک پولیس ڈیپارٹمنٹ انہیں تفصیلات فراہم کر سکتا ہے۔ٹرمپ کے دفاعی وکیل جو ٹاکوپینا نے فاکس نیوز کو بتایاکہ “یہ خوفناک ہے، اور ہم ایسے کسی بھی شخص کی مذمت کرتے ہیں جو اس طرح کے رویے میں ملوث ہے۔”