اسلام آباد(نیوزڈیسک)سابق وزیراعظم نوازشریف کے صاحبزادے حسن اور حسین نواز 12 مارچ کو پاکستان واپس پہنچیں گے۔ ایون فیلڈ کیس میں عدالت نے دونوں بھائیوں کیخلاف دائمی وارنٹ جاری کئے تھے جس کیخلاف شریف فیملی کی جانب سے احتساب عدالت میں دائمی وارنٹ معطلی کیلئے اپیل دائر کی ۔
دوران سماعت وکیل قاضی مصاح الحسن نے عدالت کو بتایا کہ دونوں بھائی العزیزیہ ریفرنس میں بری ہوچکے ہیں جبکہ قومی احتساب بیورو نے فلیگ شپ ریفرنس واپس لے لیا ،احتساب عدالت کے جج ناصر جاوید رانا نے ایون فیلڈ ریفرنس میں بھائیوں کے دائمی وارنٹ کی معطلی کے لیے دائر اپیل کی سماعت کی۔
حسن نواز کے وکیل کا مزید کہنا تھا کہ حسن اور حسین 12 مارچ کو وطن واپسی کا منصوبہ بنا رہے ہیں اس لئے ان کے وارنٹ معطل کیے جائیں۔فاضل جج نے تفتیشی افسر کو نوٹس جاری کرتے ہوئے کیس کی سماعت جمعرات تک ملتوی کر دی۔سابق وزیر اعظم نواز شریف کے صاحبزادے حسن اور حسین 2017 میں بدعنوانی کے مقدمات کے باعث برسوں سے جلاوطنی کی زندگی گزار رہے ہیں۔
