اسلام آباد(اے بی این نیوز)محکمہ موسمیات نے ملک کے مختلف شہروں میں بارش اور برفباری کی پیشگوئی کر دی۔ شمال مغربی بلوچستان، بالائی خیبر پختونخوا اورگلگت بلتستان میں بارش اور پہا ڑوں پر برفباری کا امکان، ملک کے دیگر علاقوں میں موسم سرد اور خشک رہے گا، رات کے اوقات میں پنجاب کے بیشتر اضلاع اور بالائی سندھ میں ہلکی سے درمیانی دھند چھائے رہنے کی بھی پیشگوئی کی گئی ہے۔

وادی نیلم کے علاقے گریس، جاگراں میں سفید چادر بچھ گئی، وادی لیپا، پیر چناسی میں بھی برفباری ہوئی، بالائی علاقوں کی رابطہ سڑکیں بند ہوگئیں، مقامی لوگوں کو شدید مشکلات کا سامنا کرنا پڑا۔ محکمہ موسمیات نے انتباہ جاری کرتے ہوئے کہا ہے کہ کوئٹہ، زیارت، چمن، پشین، قلعہ عبداللہ، قلعہ سیف اللہ، ناران، کاغان، چترال، دیر، سوات، کوہستان، شانگلہ اورگلگت بلتستان اور آزادکشمیر میں پہاڑوں پر برفباری کا امکان ہے جبکہ دن کو بارش بھی ہوسکتی ہے ۔بارش اوربرف باری کے باعث سڑکوں کے بند ہونے اور پھسلن کی وجہ سے ٹریفک کی روانی میں خلل کا اندیشہ ہے۔

اسلام آباد اور گرد و نواح میں موسم سرد اور مطلع جزوی ابر آلود رہنے کا امکان جبکہ،خیبرپختونخوا کے بیشتر اضلاع میں موسم سرد اور مطلع جزوی ابر آلود رہنے کے علاوہ چترال، دیر، سوات، شانگلہ، کوہستان، مانسہرہ، ایبٹ آباد، بونیر، باجوڑ، مہمند، خیبر، اورکزئی، کرم اور وزیرستان میں تیز ہواؤں کے ساتھ ہلکی بارش اور ہلکی برفباری کی پیشگوئی ۔ پنجاب کے بیشتر اضلاع میں موسم سرد جبکہ بالائی اضلا ع میں مطلع ابر آلود رہے گا۔

لاہور، شیخوپورہ، قصور، ا وکاڑہ، ساہیوال، سیالکوٹ، نارووال، گوجرانوالہ، منڈی بہاؤالدین، رحیم یار خان، خان پور، بہاولنگر، بہاولپور، پاکپتن، خانیوال، وہاڑی، فیصل آباد، ٹوبہ ٹیک سنگھ، جھنگ اور گرد و نواح میں ہلکی سے درمیانی دھند چھائے رہنے کی توقع ہے۔ سندھ کے بیشتر اضلاع میں موسم سرد اور خشک رہنے کا امکان ظاہر کیا گیا ہے۔ کشمیر میں موسم سرد اور مطلع جزوی ابر آلود رہے گا تاہم گلگت بلتستان میں بارش اوربرفباری کا امکان ظاہر کیاگیا ہے۔
مشرق وسطیٰ کے 2 بینکوں سے قرض معاہدے کیلئے تیار ہیں، وزیر خزانہ محمد اورنگزیب