اسلام آباد(اے بی این نیوز )وفاقی وزیر برائے منصوبہ بندی ترقی و خصوصی اقدامات پروفیسر احسن اقبال نے کہا ہے کہ آج کا دن ان کے لیے انتہائی خوشی کا دن ہے کہ جو سفر 2013 میں شروع ہوا تھا اس کے 10 سال آج مکمل ہوئے جس میں بہت سے نشیب وفراز آئے لیکن حکومت وزیر اعظم شہباز شریف کے وژن کے مطابق سی پیک منصوبوں کو آگے لیکر چل رہی ہے۔ان خیالات کا اظہار انہوں نے بدھ کو یہاں سی پیک کی مفاہمتی یاداشت کی ایک دہائی مکمل ہونے کے موقع پر منعقدہ تقریب سے خطاب کرتے ہوئے کیا۔وفاقی وزیر نے کہا کہ 10سال قبل 5جولائی 2013 کو سابق وزیراعظم نواز شریف اور صدر شی جن پنگ نے چین میں ایک میمورنڈم آف انڈرسٹینڈنگ پر دستخط کئے تھے جس میں چین پاکستان اقتصادی راہداری منصوبے( سی پیک ) جو بی آر آئی کا ایک فلیگ شپ منصوبہ ہے ، شروع کرنے کا فیصلہ کیا تھا۔ انہو ں نے کہا کہ اس وقت حکومت نے پورے ملک میں اس کے حوالے سے تمام سیاسی جماعتوں، مختلف مکاتب فکر کے افراد کے ساتھ اس پر بات چیت کی تھی اور سب کا متفقہ فیصلہ تھا کہ اس منصوبے کو جلد از جلد شروع کیا جائے۔ انہوں نے کہا کہ سابق وزیراعظم نواز شریف کا وژن تھا کہ پاکستان کو ایشین ٹائیگر بنائیں گے اور اس وقت حکومت نے اسی منصوبے کے ساتھ وژن 2025 شروع کیا ، یہ ان دونوں منصوبو ں کا ملاپ ہے ، اس کا مقصد تھا کہ پاکستان کو جیوپالیٹکس سے نکال کر جیو اکنامکس کے دائرے میں ڈالا جائے مگر2018میں ایک ایسی حکومت کو مسلط کیا گیا جس نے ان دونوں منصوبوں کو سرد خانے میں ڈال دیا۔ انہوں نے کہا کہ گزشتہ حکومت نے سی پیک کوگزشتہ 4سال کے دوران نظر انداز کیا اور گزشتہ سال اپریل میں حکومت کے اقتدار میں آنے کے بعد سی پیک کو بحال کیا گیا ہے جو کہ پچھلی حکومت نے روک دے تھے جبکہ گوادر میں بجلی، انفراسٹرکچر، پانی اور دیگر کے کئی منصوبے مکمل ہو چکے ہیں ۔وفاقی وزیر نے مزید کہا کہ سابقہ حکومت نے سی پیک منصوبوں کو تباہ کیا جس کے نتیجے میں پاکستان کو مشکلات کا سامنا کرنا پڑا۔ انہوں نے کہا کہ پاکستانی عوام سی پیک کو کامیاب بنانے میں چینیوں کے تعاون کو کبھی فراموش نہیں کر سکتے۔وفاقی وزیر نے سابق حکومت کو تنقید کا نشانہ بناتے ہوئے کہا کہ اگر سی پیک منصوبے چھ ماہ کے ریکارڈ وقت میں مکمل ہو سکتے ہیں تو پچھلی حکومت نے چار سال کی مدت میں کیوں ان منصوبوں کو روکے رکھا۔انہوں نے کہا کہ چیلنجوں کے باوجود موجودہ حکومت نے ایک سال میں سی پیک کے منصوبوں کو کامیابی سے مکمل کیا، جو کہ وزیر اعظم شہباز شریف کے مضبوط عزم کو ظاہر کرتا ہے۔ انہوں نے چین اور پاکستان کے درمیان قابل قدر شراکت داری کو مزید تسلیم کیا جس نے سی پیک منصوبوں کے کامیاب نفاذ کو ممکن بنایا ہے اور اس رفتار کو برقرار رکھنے کے لیے مسلسل تعاون کی اہمیت پر زور دیا۔
