نئی دہلی (نیوزڈیسک)بھارتی جہیز کلچر کی بھینٹ ایک اور دلہن چڑھ گئی، جہیز کا فرنیچر پرانا ہونے کے باعث دولہے نے بارات لانے سے انکار کر دیا۔بھارتی میڈیا رپورٹس کے مطابق حیدرآباد میں سسرال کی جانب سے جہیز میں پرانا فرنیچر ملنے پر دولہے نے عین وقت پر شادی سے انکار کر دیا۔دولہا بس ڈرائیور ہے اور اتوار کو اس کی شادی ہونے والی تھی تاہم وہ بارات نہیں لے کر آیا جس کے بعد دلہن کے والد نے پولیس میں شکایت درج کرائی اور مقدمہ درج کر لیا گیا۔دلہن کے والد نے میڈیا کو بتایا کہ جب میں شادی سے انکار کی وجہ پوچھنے دلہے کے گھر گیا تو لڑکے کے والد نے میرے ساتھ کافی بدتمیزی کی۔ان کا مزید کہنا تھا کہ میں نے انہیں وہ سامان نہیں دیا جو انہوں نے مانگا تھا اور فرنیچر بھی پرانا تھا اس لئے انہوں نے آنے سے انکار کر دیا ۔دلہن کے والد نے میڈیا سے گفتگو کرتے ہوئے بتایا کہ میں نے شادی کی دعوت کا انتظام کیا ، تمام رشتہ داروں اور مہمانوں کو مدعو کیا لیکن دولہا بارات لے کر ہی نہیں آیا۔پولیس کے مطابق جہیز پر پابندی ایکٹ کی متعلقہ دفعات کے تحت مقدمہ درج کیا گیا ہے اور مزید تحقیقات جاری ہیں۔
