پشاور (اے بی این نیوز)پاک افغان بارڈر پر افغانستان کی طرف سے بلا اشتعال فائرنگ کی گئی جس کا پاک فوج نے بھرپور جواب دیا، پاکستانی فورسزکی بھر پور جوابی کارروائی سے متعددافغان فوجی ہلاک ہوگئے، بھاری نقصانات کے باعث متعدد افغان پوسٹیں خالی ہو گئیں۔

سکیورٹی ذرائع کے مطابق افغان فورسز نے پاک افغان بارڈر پر انگور اڈا، باجوڑ،کرم، دیر، چترال، اور بارام چاہ کے مقامات پر بھی بِلا اشتعال فائرنگ کی۔سکیورٹی ذرائع کے مطابق افغان فورسز کی فائرنگ کا مقصد خوارج کی تشکیلوں کو بارڈر پار کروانا بھی تھا۔سکیورٹی ذرائع کا کہنا ہےکہ پاک فوج کی چوکس پوسٹوں کی جانب سے بھرپور اور شدید جواب دیا جارہا ہے۔

پاک فوج نے فوری شدید رد عمل دیتے ہوئے متعدد افغانی پوسٹوں کو مؤثر طریقے سے نشانہ بنایا۔سکیورٹی ذرائع کے مطابق پاک فوج نے اسپن بولدک سیکٹر، افغانستان میں افغان طالبان کا عصمت اللہ کرار کیمپ بھی تباہ کر دیا ہے، یہ کیمپ افغان طالبان کے سب سے بڑے کیمپس میں سے ایک تھا۔

ذرائع کا بتانا ہے کہ عصمت اللہ کرار کیمپ سے پاکستان مخالف دہشتگرد کارروائیاں عمل میں لائی جاتی تھی، کیمپ میں تباہی سے افغان طالبان اور چھپے خارجیوں کے بھاری نقصانات کی اطلاعات ہیں۔سکیورٹی ذرائع کے مطابق پاکستانی فوج نے افغان طالبان کی توپسر پوسٹ کر قبضہ کر لیا ہے جس کی ویڈیو بھی سامنے آئی ہے، افغان طالبان کی توپسر پوسٹ کرم سیکٹر کے مخالف میں واقع ہے، ویڈیو میں پاکستانی فورسز کو توپسر پوسٹ کی طرف پیش قدمی کرتے دیکھا جاسکتا ہے۔

سکیورٹی ذرائع کے مطابق پاکستان کی جانب سے آرٹلری، ٹینکوں،ہلکے اور بھاری ہتھیاروں کا استعمال کیا جارہاہے، افغانستان سے پاکستان کے خلاف استعمال ہونے والے خارجی ٹھکانوں کو نشانہ بنانے کیلئے فضائی وسائل اور ڈرونز کا بھی استعمال کیا جا رہا ہے۔ سکیورٹی ذرائع کا کہناہے کہ افغان پوسٹیں خارجیوں کو کور فائر دینے میں ناکام ہوگئیں،خارجی تشکیلیں منتشر ہوگئے۔

سکیورٹی ذرائع کے مطابق پاکستان کی بروقت کارروائی سے افغانستان کی متعدد بارڈر پوسٹیں تباہ ہوگئیں، درجنوں افغان فوجی اور خوارج ہلاک ہوگئے اور طالبان متعدد لاشیں اور پوسٹیں چھوڑ کر فرار ہوگئے۔ذرائع نے بتایا ہے کہ پاک فوج نے جنوبی وزیرستان کے ملحقہ سرحدی علاقوں میں متعدد افغان چوکیاں تباہ کر دیں، پاک فوج کی جانب سے افغان پوسٹوں پر پاکستان کا جھنڈا بھی لہرا دیا گیا، ویڈیو میں نظر آرہا ہے کہ افواجِ پاکستان افغان پوسٹوں پرپاکستانی جھنڈا لہرا رہی ہیں۔ سکیورٹی ذرائع کے مطابق پاک فوج نےافغانی دوران میلا اور ترکمانزئی کیمپس بھی تباہ کر دیے۔

سکیورٹی ذرائع کا کہنا ہے کہ بارامچاہ سیکٹر میں پاک فوج نے افغان فورسز کو منہ توڑ جواب دیا۔ افغان فورسز کی شہیدان پوسٹ کو نقصان پہنچا اور متعدد ہلاکتوں کی اطلاع ہے۔سکیورٹی ذرائع کے مطابق پاک فوج نے برامچا سیکٹر میں افغانی شہیدان پوسٹ تباہ کر دی جبکہ پاکستانی فورسز نے خرلاچی سیکٹر میں افغانی پوسٹوں کو نشانہ بنایا۔

سکیورٹی ذرائع کے مطابق کرّم ایجنسی میں بھی افغان فورسز کی ایک اور چوکی تباہ کر دی گئی جبکہ پاکستانی فورسز نے افغان جنڈوسر پوسٹ بھی تباہ کر دی۔سکیورٹی ذرائع کے مطابق پاک فوج کو خارجیوں اور افغان فورسز کے خلاف ایک اور بڑی کامیابی ملی ہے۔ مؤثر فائر سے کھرچر فورٹ مکمل تباہ کر دی گئی ہے۔

کھرچر فورٹ فتنہ الخوارج کا مرکز تھا۔سکیورٹی ذرائع کا کہنا ہے کہ مؤثر فائر سے لیو بند،قلعہ عبداللہ سیکٹر میں افغانی پوسٹ مکمل تباہ کردی گئی ہے۔اس کے علاوہ کنڑ میں بھی افغان پوسٹ تباہ کی گئی جس کے بعد افغان فوجی پوسٹ پر لاشیں چھوڑ کے بھاگ گئے۔سکیورٹی ذرائع کے مطابق پاکستان نے طالبان فورسز کے منوجبا کیمپ بٹالین ہیڈکوارٹر پر کامیاب اسٹرائیک کی اور اسے مکمل تباہ کر دیا۔

سکیورٹی ذرائع کا کہنا ہے کہ منوجبا کیمپ میں موجود درجنوں طالبان سپاہی اورخارجیوں کے ہلاک ہونے کی اطلاعات ہیں۔علاوہ ازیں سکیورٹی ذرائع کے مطابق پاکستان نےطالبان فورسز کے درانی کیمپ پر کامیاب اسٹرائیک کی اور کیمپ مکمل تباہ کر دیا۔ درجنوں طالبان اور خارجیوں کے ہلاک ہونے کی بھی اطلاعات ہیں۔

سکیورٹی ذرائع کاکہنا ہے کہ پاکستان نے طالبان فورسز کے درانی کیمپ 2 پرکامیاب اسٹرائیک کی، اورکیمپ مکمل تباہ کر دیا۔سکیورٹی ذرائع کے مطابق درانی کیمپ 2 میں 50 سے زائد طالبان اور خارجیوں کے ہلاک ہونے کی اطلاعات ہیں۔

درانی کیمپ 2 خارجیوں کی پاکستان میں دہشت گردانہ کارروائیوں کیلئے مرکزی لانچ پیڈ کا کام کرتا تھا۔سکیورٹی ذرائع کاکہنا ہے کہ پاکستان نے طالبان فورسز کے غزنالی ہیڈ کوارٹر نوشکی سیکٹر کو نشانہ بناکر تباہ کر دیا جس کے نتیجے میں درجنوں طالبان اور خارجیوں کے ہلاک ہونے کی اطلاعات ہیں۔
دریں اثناء سوات اور باجوڑ کے عوام کی جانب سے پاک فوج کی جوابی کاروائی کا خیر مقدم کیا گیا، انہوں نے کہا کہ ہمیں پاکستانی افواج پر فخر ہے جنہوں نے افغانستان کو پیچھے ہٹنے پر مجبور کر دیا۔

ہماری افواج الحمدللہ اس قابل ہیں کہ وہ اس دھرتی کی حفاظت کر سکیں۔پاک افواج نے بھرپور اور بروقت جواب دیا ہے۔ہم عوام اپنی پاک فوج کے شانہ بشانہ کھڑے ہیں۔ہم نے افغان بھائیوں کو یہاں رہائش دی، انہیں روٹی کھلائی، پہناوے اور روزگار کے مواقع فراہم کیے۔ یہ سب انسانیت اور بھائی چارے کا تقاضا تھا۔
مزید پڑھیں: پاک فوج نے افغان پوسٹوں پر پاکستان کا جھنڈا لہرا دیا ،ویڈیو دیکھئے