کراچی ( نیوز ڈیسک )ڈوپ ٹیسٹ مثبت آنے پر پاکستان اسپورٹس بورڈ نے 8 ایتھلیٹس پر پابندی لگادی جبکہ 5 مزید ایتھلیٹس کے خلاف کارروائی جاری ہے۔
پاکستان اسپورٹس بورڈ (پی ایس بی) نے 2024ء میں مجموعی طور پر 140 اینٹی ڈوپنگ ٹیسٹ کیے، جن میں سے 13 ایتھلیٹس کے ٹیسٹ مثبت آئے، بورڈ نے 8 کھلاڑیوں پر پابندی عائد کردی۔رپورٹ کے مطابق پابندی کا سامنا کرنیوالے 8 کھلاڑی مختلف کھیلوں سے تعلق رکھتے ہیں، ان میں 5 ویٹ لفٹنگ، ایک باڈی بلڈنگ، ایک سائیکلنگ اور ایک کا تعلق ایتھلیٹکس سے ہے۔
رپورٹ میں بتایا گیا ہے کہ ویٹ لفٹنگ میں فرقان احمد پر 2 سال، جمیل اختر اور محمد یوسف پر 3، 3 سال جبکہ غلام حسین شاہد پر 4 سال کی پابندی عائد کی گئی ہے، ارسلان رؤف کو 3 سال کیلئے معطل کردیا گیا ہے۔
پی ایس بی کے مطابق سائیکلنگ میں نتالیہ خان اور ایتھلیٹکس کے اسپرنٹر انیس خان پر ڈوپ ٹیسٹ مثبت آنے پر 3، 3 سال کی پابندی لگائی گئی ہے جبکہ تن ساز کاشف شاہ کو 4 سال کیلئے معطل کردیا گیا ہے۔پاکستان اسپورٹس بورڈ کے مطابق شاٹ پٹ کی ایتھلیٹ ماہ نور ڈوگر اور مڈل ڈسٹنس رنر ربیلہ فاروق کے ڈوپ ٹیسٹ بھی مثبت آئے ہیں، جن کیخلاف کارروائی جاری ہے، اسپرنٹر نوید انجم، ویٹ لفٹر ملک سبحان اور حماد علی کو بھی نوٹس جاری کر دیئے گئے ہیں۔
مزید پڑھیں: پشاور ،ہوٹل میں سلنڈر کا خوفناک دھماکہ،12 افراد زخمی
