شمالی وزیرستان کے میر علی علاقے میں ایک پولیس چیک پوسٹ پر ہونے والے خودکش حملے میں 4 سیکیورٹی اہلکاروں سمیت 6 افراد جان کی بازی ہار گئے۔ پولیس کے مطابق، یہ حملہ عیدک کے علاقے میں ہوا جس میں کئی افراد زخمی بھی ہوئے۔
حکام نے تصدیق کی کہ حملے میں 4 سیکیورٹی اہلکار اور 2 شہری شامل ہیں۔ امدادی کارروائیاں جاری ہیں، اور متاثرین کو ہسپتال منتقل کیا جا رہا ہے۔ سیکیورٹی فورسز نے علاقے کو گھیرے میں لے کر سرچ آپریشن بھی شروع کر دیا ہے۔
صدر مملکت آصف علی زرداری نے اس حملے پر گہرے دکھ کا اظہار کرتے ہوئے کہا کہ یہ بزدلانہ اقدام ہے۔ ایوان صدر کے پریس ونگ سے جاری بیان میں انہوں نے خودکش حملے کی مذمت کی اور کہا کہ دہشت گرد اپنے مذموم عزائم میں کامیاب نہیں ہوں گے۔
انہوں نے دہشت گردی کے خاتمے کے لیے ہر ممکن اقدامات اٹھانے کی ضرورت پر زور دیتے ہوئے شہید اہلکاروں کو خراج عقیدت پیش کیا اور لواحقین کے لیے صبر اور زخمیوں کی جلد صحت یابی کی دعا کی۔
