لاہور (اے بی این نیوز) معروف یوٹیوبر سعد الرحمٰن عرف ڈکی بھائی اور ان کی اہلیہ عروب جتوئی ایک دن میں ایک کروڑ روپے خرچ کرنے کے چیلنج پر بنائے گئے وی لاگ کے باعث سوشل میڈیا پر توجہ کا مرکز بن گئے۔
عروب جتوئی نے اپنے منی وی لاگ میں بتایا کہ انہوں نے اور ان کی ٹیم نے ایک ہی دن میں ایک کروڑ روپے خرچ کرنے کا چیلنج قبول کیا۔ ویڈیو میں دونوں نے مختلف اشیا اور خدمات پر رقم خرچ کی۔
چیلنج کا آغاز ایک لگژری ریسٹورنٹ سے ہوا، جہاں کھانے کا بل تقریباً 50 ہزار روپے بتایا گیا۔ اس کے بعد گاڑی خریدنے کی تجویز سامنے آئی، تاہم عروب جتوئی نے گاڑی خریدنے کے بجائے جدید آئی فون لینے کا فیصلہ کیا، جس کی قیمت تقریباً 10 لاکھ روپے بتائی گئی۔
بعد ازاں دونوں ایک زیورات کی دکان پہنچے، جہاں عروب جتوئی نے سونے کے مختلف سیٹس اور چوڑیاں خریدیں۔ ویڈیو میں انہوں نے سونے کو سرمایہ کاری کے طور پر اہم قرار دیا۔ ان کے مطابق زیورات کی خریداری پر چیلنج کی رقم کا بڑا حصہ خرچ ہوا، جبکہ دکاندار کی جانب سے ایک سونے کا سیٹ تحفے میں دینے کا بھی ذکر کیا گیا۔
View this post on Instagram
ویڈیو سامنے آنے کے بعد سوشل میڈیا صارفین کی جانب سے مختلف ردعمل سامنے آیا۔ بعض صارفین نے ایک دن میں اتنی بڑی رقم خرچ کرنے اور اسے عوامی سطح پر دکھانے پر تنقید کی، جبکہ کچھ نے اسے غیر ضروری دولت کی نمائش قرار دیا۔
کچھ صارفین نے مہنگائی اور معاشی مشکلات کا حوالہ دیتے ہوئے کہا کہ ایسے حالات میں مہنگی خریداری کو نمایاں کرنے سے گریز کیا جانا چاہیے۔ بعض افراد نے مذہبی اور اخلاقی حوالوں سے بھی اس طرز کے مواد پر سوالات اٹھائے۔
دوسری جانب کچھ صارفین نے اس تنقید سے اختلاف کرتے ہوئے کہا کہ ذاتی رقم خرچ کرنا ان کا اپنا معاملہ ہے، جبکہ ایسے وی لاگز سے تخلیق کاروں کو توجہ اور آمدن بھی حاصل ہوسکتی ہے۔
یوں ایک دن میں ایک کروڑ روپے خرچ کرنے کے چیلنج پر بننے والا یہ وی لاگ سوشل میڈیا پر مہنگے طرزِ زندگی کی نمائش، مواد تخلیق کرنے والوں کی ذمہ داری اور ناظرین کے ردعمل کے حوالے سے بحث کا باعث بن گیا ہے۔
مزید پڑھیں:ملائیشیا میں سوگ کی فضا، سابق وزیراعظم مہاتیر محمد کی اہلیہ چل بسیں
