اسلام آباد (نیوز ڈیسک) اوگرا نے موجودہ اور نئے گیزروں میں کونیکل بیفلز کی تنصیب کو لازمی قرار دے دیا ہے ۔ ترجمان اوگرا کے مطابق یہ فیصلہ توانائی کو بچانے اور ملک میں گیس کی قلت پرقابوپانے کے لیے کیا گیا ہے۔
ایک محتاط اندازے کے مطابق کونیکل بیفلز کی تنصیب کے نتیجے گیس کے بلوں میں20 سے 25 فیصد کی بچت ہوگی ۔ کونیکل بیفلز کے استعمال سے قدرتی گیس کے جاری بحران کو کم کرنے میں مدد ملے گی۔ ملک میں گیس صارفین کی کل تعداد ایک کروڑ چھ لاکھ پچاس ہزار ہے ۔ اس میں سوئی ناردرن گیس کے چوہتر لاکھ پچاس ہزار اور سوئی سدرن گیس کے بتیس لاکھ صارفین شامل ہیں۔ تقریباً تیس لاکھ اٹھاسی ہزار صارفین گیزر استعمال کرتے ہیں ۔ اس اقدام کی مدد سے گیس میں یومیہ کل بچت 6.4 ایم ایم سی ایف ڈی ہوگی۔ کونیکل بیفلز کی تنصیب کے لیے ڈیڈ لائن دسمبر 2023 گئی ہے ۔ اوگرا نے تمام صارفین ، دلچسپی رکھنے والے افراد اور فریقین کو عوامی سماعت میں اپنا نقطہ نظر پیش کرنے کے لیے مدعو کیا تھا۔