لاہور(نیوزڈیسک)پاکستان تحریکِ انصاف (پی ٹی آئی)کے صدر پرویز الہٰی نے کہا ہے کہ لندن میں بیٹھے شہباز شریف اور نواز شریف عدلیہ کے خلاف سازش تیار کر رہے ہیں۔اتوار کوایک بیان میں صدرپی ٹی آئی چوہدری پرویز الہٰی نے کہا کہ ہمارے 20 لوگوں کو انہوں نے پکڑا ہوا ہے، مجھ پر 17 مقدمے درج ہیں۔انہوںنے کہا کہ انہوں نے جاتے جاتے ایک بہت بڑی ڈکیتی کی ہے، ہمارے جتنے مہمان آئے تھے، سب کے موبائل لے گئے، 10 موٹر سائیکلیں لے گئے، 10 روز بعد ہم ضمانت کرا کے آئے۔پرویز الٰہی نے کہا کہ پی ڈی ایم نے ملک کے آئین کے ساتھ کھلواڑ کیا، عمران خان نے آئین کو متحد رکھا ہوا ہے، ایک منصوبہ بندی کے تحت عدلیہ کے خلاف مہم چلائی جا رہی ہے۔انہوںنے کہاکہ تمام بارز اور وکلاء برادری ایک نیا انقلاب لے کر آئیں گے، بلاول نئے ہیں، وہ وہاں پر کیا نمائندگی کریں گے؟ مجھے 14 مئی کے اثرات وقوع پذیر ہوتے نظر آ رہے ہیں، وہ اثرات ایسے ہیں کہ ان کی آنکھیں باہر نکل آئیں گی۔انہوں کہا کہ دو چار بندے ہیں وہ کہتے ہیں کہ ہم آئین ہیں، پی ڈی ایم نے گند پھیلایا ہوا ہے، اعلیٰ عدلیہ نے ملک کو سنبھالا ہوا ہے۔