کراچی (نیوزڈیسک)کراچی سے مدینہ کیلئے قومی ایئرلائن کی پرواز روانگی کے 55 منٹ بعد فنی خرابی کے باعث واپس کراچی آگئی۔ذرائع نے بتایاکہ پرواز پی کے 743 میں کراچی سے روانگی کے 20 منٹ بعد فنی خرابی پیدا ہوگئی۔ عمرہ زائرین کو لے جانے والی پرواز کو ٹیک اف کے 55 منٹ بعد واپس کراچی ایئر پورٹ اتار دیا گیا۔طیارے میں فنی خرابی کی وجہ سے مسافروں کو پہلے لاؤنج پھر ہوٹل منتقل کردیا گیا۔ایئرلائن انتظامیہ کی جانب سے اب پرواز کی کراچی سے مدینہ روانگی کیلئے رات 12 بجے کا وقت دیا گیا ہے۔ پی آئی اے کی ٹیکنیکل ٹیم طیارے کا معائنہ کر رہی ہے۔ترجمان پی آئی اے کے مطابق خرابی دور ہوتے ہی پرواز کو مدینہ منورہ کیلئے روانہ کیا جائے گا۔ترجمان کا مزید کہنا تھا کہ اسٹاف کی جانب سے مسافروں کا مکمل خیال رکھا جا رہا ہے۔