اسلام آباد(نیوزڈیسک)وفاقی تحقیقات ادارے (ایف آئی اے) کے سائبر کرائم اسلام آباد نے پی ٹی آئی کے رہنما سینیٹر اعظم سواتی کے متنازع ٹوئٹ کیس میں ضمانت منسوخی کے لیے اسلام آباد ہائی کورٹ میں درخواست دائر کردی۔ ذرائع کے مطابق اعظم سواتی نے راولپنڈی میں ایک تقریب کے دوران سیکیورٹی اداروں سے متعلق متنازع گفتگو کی تھی جس کے بعد ایف آئی اے سائبر کرائم نے عدالت سے رجوع کیا۔ذرائع نے بتایا کہ چیف جسٹس عامر فاروق کل (بروز منگل) ایف آئی اے کی درخواست پر سماعت کریں گے۔ ذرائع نے بتایا کہ اعظم سواتی کی راولپنڈی کی تقریر کا ٹرانسکرپٹ بھی درخواست کے ساتھ منسلک ہے۔خیال رہے کہ ایف آئی اے سائبر کرائم اسلام آباد نے اعظم سواتی کے خلاف مقدمہ درج کیا تھا۔ اعظم سواتی کو اسلام آباد ہائیکورٹ نے ضمانت پر رہائی کا حکم دیا تھا۔ عدالت نے ضمانت منظوری میں کہا تھا اعظم سواتی کے جرم دہرانے پر ضمانت منسوخی دائر ہو سکتی ہے۔