لاہور (اے بی این نیوز) پاکستان مسلم لیگ (ن) کے رہنما حسن علی کھوکھر نے پارٹی چھوڑ کر پاکستان پیپلزپارٹی (پی پی پی) میں شمولیت اختیار کرلی۔
پیپلز سیکرٹریٹ ماڈل ٹاؤن میں سابق وزیراعظم اور پاکستان پیپلز پارٹی وسطی پنجاب کے صدر راجہ پرویز اشرف کی موجودگی میں سمبڑیال سے ٹی ایل پی کے ٹکٹ ہولڈر ساجد رحمانی، عبید اللہ طور اورشاہد عمران ایڈووکیٹ، عندلیب اشرف، اشرف شاہین، اقبال نقوی، ثوبیہ ملک، محمد صدیق چیئرمین حوریہ کنسٹرکشن کمپنی، مسلم لیگ ن کے حسن علی کھوکھر نے پیپلزپارٹی میں شمولیت کا اعلان کیا۔ اس موقع پر راجہ پرویز اشرف نے رہنماؤں کو پارٹی مفلر پہنائے۔
راجہ پرویز اشرف نے کہا ہے کہ ڈائیلاگ، ڈائیلاگ، ڈائیلاگ اور مذاکرات ہی ہر مسئلہ کا حل ہیں، پی ٹی آئی کو کہوں گا کہ ملکی مفاد میں مذاکرات کا راستہ اپنائیں، کوئی ایسا راستہ اختیار نہ کریں جس سے ملکی سالمیت کو خطرہ ہو یا ملکی بدنامی ہو، افراتفری پھیلے۔
انہوں نے پی آئی اے کی نجکاری کو ملکی مفاد کے حق میں قرار دیتے ہوئے کہا کہ ہم صرف پی آئی اے ملازمین کا تحفظ یقینی چاہتے ہیں، اگر ان کے روزگار کا تحفظ ہے تو پھر کوئی مضائقہ نہیں، حکومت بزنس نہ کرے بلکہ ایسی فضا پیدا کرے جس میں کاروبار ہو سکیں۔ میں سمجھتا ہوں کہ وزیر اعظم کی جانب سے مذاکرات کی دعوت ایک احسن اقدام ہے۔
ان کا کہنا تھا کہ پاکستانی افواج نے جو کامیابی حاصل کی اس کی پیچھے چٹان کی طرح کھڑے ہونے کی ضرورت ہے ،قبل ازیں چرچ میں کرسمس تقریب سے خطاب کرتے ہوئے راجہ پرویز اشرف نے کہا کہ پاکستان میں تمام مذاہب،عقیدے کے لوگ رہتے ہیں۔
راجہ پرویز اشرف نے کہا کہ پہلے پاکستانی پھر مسلم یا کرسچن ہیں، تمام مذاہب کا پیغام محبت، پیار اور ایک دوسرے کی مدد اور آسانیاں پیدا کرنا ہے، مجھے یقین ہے کہ آئندہ الیکشن میں پیپلز پارٹی بھاری اکثریت سے جیتے گی، پیپلز پارٹی ایک خاندان ہے جس میں کوئی چھوٹا بڑا نہیں۔
مزید پڑھیں۔بارشیں برسانے والا سسٹم ملک میں آج داخل ہوگا
