تل ابیب (نیوزڈیسک)ہسپانوی وزیرِ اعظم پیڈرو سانچیز نے غزہ میں اسرائیلی جارحیت پر اپنے بیان میں کہا کہ یورپی یونین کو فلسطینی ریاست کو تسلیم کرلینا چاہیے کیونکہ اس سے اسرائیل فلسطین تنازعہ ختم کرنے خطے کومستحکم کرنے میں مدد ملے گی۔ ہسپانوی وزیراعظم پیڈرو سانچیز کے اس بیان پر اسرائیل وزیراعظم تلملا اٹھا جبکہ اسرائیلی وزیر خارجہ ایلی کوہن نے ہسپانوی وزیر اعظم کے بیان کی آڑ میں میڈرڈ میں تعینات اسرائیلی سفیر کو واپس طلب کرنے کا اعلان کردیا۔ایلی کوہن نے ’’ ایکس‘‘ پر کہا سپین کے وزیر اعظم کے ہتک آمیز بیانات کے بعد میں نے سپین میں اسرائیلی سفیر سے رابطہ کیا اور مشاورت کے لیے ان کو واپس آنے کا کہہ دیا ۔اسرائیل نے تل ابیب میں ہسپانوی سفیر کو بھی طلب کرلیا۔ اسے اس وقت سرزنش کی گئی جب ہسپانوی وزیر اعظم پیڈرو سانچیز نے کہا کہ انہیں اسرائیل کے بین الاقوامی انسانی قانون کی تعمیل کے بارے میں سنگین شکوک ہیں۔ اسرائیلی وزیر اعظم بنجمن نیتن یاہو کے ترجمان کا کہنا تھا کہ وزیراعظم نے سانچیز کے بیان کے بعد وزیر خارجہ ایلی کوہن کو سفیر کو طلب کرنے کا حکم دیا تھا۔یاد رہے ہسپانوی وزیر اعظم پیڈرو سانچیز نے کہا تھا کہ اسرائیل غزہ میں جو کچھ کر رہا ہے وہ ناقابل قبول ہے۔ محصور غزہ کی پٹی میں شہریوں کی ہلاکتوں کی تعداد نے بین الاقوامی انسانی قانون کے احترام پر سوالیہ نشان لگا دیا ہے۔سانچیز نے ہسپانوی سرکاری ٹی وی ای چینل کو جمعرات کو ایک انٹرویو میں مزید کہا کہ مرنے والے بچوں کی بڑھتی ہوئی تعداد پر مجھے سنجیدگی سے شک ہے کہ آیا اسرائیل بین الاقوامی انسانی قانون کی پاسداری کر رہا ہے۔ غزہ میں ہزاروں بچوں سمیت معصوم شہریوں کا اندھا دھند قتل مکمل طور پر ناقابل قبول ہے۔
