اسلام آباد( نامہ نگار)وفاقی وزیر برائے قومی صحت عبدالقادر پٹیل نے کہا ہے کہ حکومت میڈیکل کے شعبے کی ترقی اور بہتری کیلئے موثر اور عملی اقدامات کر رہی ہے، پاکستان کی تمام جیلوں میں قید بچوں کو نرسنگ، الائیڈہیلتھ سائنسز،ایم بی بی ایس میں ایڈمیشن اور تعلیم دی جائے گی،پی ایم سی کو ہدایات جاری کر دی گئی ہے۔جمعہ کو اپنے بیان میں وفاقی وزیر نے کہا کہ حکومت میڈیکل کے شعبے کی ترقی اور بہتری کیلئے موثر اور عملی اقدامات کررہی ہے۔ انہوں نے کہا کہ 2023 میں پاکستان کی تمام جیلوں میں قید بچوں کو نرسنگ، الائیڈہیلتھ سائنسز،ایم بی بی ایس میں ایڈمیشن اور تعلیم دی جائے گی۔پاکستان کی تمام پبلک سیکٹر میڈیکل یونیورسٹیز کو یہ لازم کیا جائے گا کہ کوئی بھی بچہ اگر جیل میں ڈاکٹر بھی بننا چاہے تو یہ اس کا حق ہے۔انہوں نے کہا کہ اس سلسلہ میں پاکستان میڈیکل کمیشن کو ہدایت جاری کر دی گئی ہیں۔ انہوں نے کہاکہ جیل میں موجود لائق اورذہین بچوں کو ڈاکٹر ، نرسز اور میڈیکل کے کسی بھی شعبے میں تعلیم حاصل کرنے کے لئے مواقع فراہم کئے جائیں گے،اس کام کا مقصد جیل میں قید تمام بچوں کو معاشرے میں ایک نمایاں مقام دلانا ہے۔انہوں نے کہا کہ حکومت معاشرے کے ہر طبقے اور فرد کو یکساں سہولیات فراہم کرنے کیلئے پر عزم ہے۔معاشرے کی ترقی کیلئے ہر شخص کو مساوی تعلیم کی سہولیات دینا ہمارا فرض ہے۔تعلیم اور صحت کے بغیر کوئی معاشرہ ترقی کی راہ پر گامزن نہیں ہو سکتا ۔ انہوں نے کہا کہ ہماری حکومت عوامی امنگوں کی ترجمانی کرتی ہے۔عوام کی فلاح وبہبود خدمت ہمارا حقیقی نصب العین ہے۔
![](https://abnnews.pk/wp-content/uploads/2024/09/parlilment-371x212.jpg)