اسلام آباد( اے بی این نیوز) سینیٹر سرمد علی نے پمز اسلام آباد میں آتشزدگی کے المناک واقعے میں معصوم نومولود بچوں کی ہلاکت پر گہرے دکھ اور افسوس کا اظہار کیا ہے۔
سینیٹر سرمد علی نے کہا کہ معصوم نومولود بچوں کی جانوں کا ضیاع انتہائی دلخراش اور ناقابلِ تلافی سانحہ ہے۔ ہر بچے کو تحفظ، نگہداشت اور زندگی کا حق حاصل تھا، کسی بھی خاندان کو اپنے لختِ جگر کے حوالے سے اس قدر ناقابلِ تصور صدمے سے نہیں گزرنا چاہیے۔
انہوں نے کہا کہ غمزدہ والدین اور خاندانوں کے دکھ میں برابر کے شریک ہیں اور ان کے لیے دلی ہمدردی اور دعائیں ہیں۔ اس المناک واقعے کی مکمل، شفاف اور غیر جانب دارانہ تحقیقات ہونی چاہئیں تاکہ واقعے کے ذمہ داران کا تعین کیا جا سکے۔
سینیٹر سرمد علی نے کہا کہ جہاں بھی غفلت یا حفاظتی اقدامات اور ضابطوں کی خلاف ورزی ثابت ہو، وہاں قانون کے مطابق ذمہ داروں کے خلاف مناسب کارروائی عمل میں لائی جانی چاہیے۔
انہوں نے کہا کہ ہسپتال عوام کے لیے تحفظ، علاج اور شفا کے مراکز ہونے چاہئیں، انہیں خوف اور خطرے کا باعث نہیں بننا چاہیے۔
سینیٹر سرمد علی نے دعا کی کہ اللہ تعالیٰ جاں بحق ہونے والے معصوم بچوں کے والدین اور اہلِ خانہ کو یہ عظیم صدمہ برداشت کرنے کی ہمت، صبر اور حوصلہ عطا فرمائے اور انہیں سکونِ قلب نصیب کرے۔ آمین۔
مزید پڑھیں:مائیں اپنے بچوں کو غفلت سے زندہ جلنے کے لیے نہیں جنتی ہیں، بلاول بھٹو
