کراچی(اے بی این نیوز) پاکستانی کرکٹر امام الحق نے اپنے حوالے سے حیران کن انکشاف کرتے ہوئے کہا کہ پرچی کے طعنے پر شاور کے نیچے رویا کرتا تھا۔امام الحق نےنجی ٹی وی چینل کو انٹرویو دیتے ہوئے کہا کہ جب میں نے ڈیبیو کیا تو اس وقت میری عمر 23 برس تھی، ڈومیسٹک کرکٹ میں اچھا پرفارم کرکے ٹیم میں آیا مگر میرے چچا انضمام الحق اس وقت چیف سلیکٹر تھے، اس لئے مجھے پرچی کہا جانے لگا۔انہوں نے کہا کہ میں ٹورز کے دوران اپنا موبائل منیجر کو دے دیتا تھا، شاور کے نیچے آنسو بہاتا تھا مگر اب یہ چیزیں کم ہو گئی ،ٹویٹر اور انسٹاگرام وغیرہ استعمال نہیں کرتا، صرف واٹس ایپ دیکھتا ہوں۔بیٹر کا کہنا تھا کہ اب بھی صفر پر آؤٹ ہوجاؤں تو لوگ پرچی پرچی کہنا شروع ہوجاتے ہیں، ون ڈے رینکنگ کے ٹاپ 5 میں شامل ہونا ایک اعزاز ہے، اس کے ساتھ ذمہ داری بھی عائد ہوتی ہے کہ اچھا پرفارم کرنا ہے، ویسے میرے لئے اپنی رینکنگ سے ٹیم کا ٹاپ 3 میں موجود ہونا زیادہ اہم ہے۔