راولپنڈی(نیوز ڈیسک) پاکستان کرکٹ ٹیم کے کپتان بابر اعظم نے کہا کہ ہم پہلے10 اوور اچھا کھیلے لیکن اس کےبعد بہتر کھیل نہیں پیش کر پائے، شکست کا ملبہ کسی پر نہیں ڈالتا، ٹیم جیتتی ہے اور ٹیم ہی ہارتی ہے ۔میچ کے بعد پریس کانفرنس کرتے ہوئے پاکستان کرکٹ ٹیم کے کپتان بابر اعظم نے کہا کہ پنڈی کرکٹ اسٹیڈیم کی پِچز 180 اسکور کی ہوتی ہیں، افتخار احمد اور رضوان کی اننگز کے بعد 200 کا سوچ رہا تھا ، پاکستان کی جیسی بولنگ تھی ہمیں مزید بہتر کھیلنا چاہیے تھا،ون ڈے سیریز میں دو دن کا وقفہ ہے، جلد دوسرے فارمیٹ میں خود کو ڈھالیں گے، سب پروفیشنل ہیں، کھلاڑی ہر وقت کرکٹ سیکھتے رہتے ہیں۔ واضح رہے کہ نیوزی لینڈ نے پانچ ٹی ٹوئنٹی میچوں کی سیریز کے آخری میچ میں پاکستان کو شکست دے کر سیریز 2-2 سے برابر کر دی، ایک میچ بارش کی نذر ہو گیا تھا،آخری ٹی ٹوئنٹی میں نیوزی لینڈ نے 194 رنز کا ہدف باآسانی 4 وکٹوں کے نقصان پر حاصل کرلیا۔