بنگلادیش ن(اے بی این نیوز)بنگلادیش نے ایک اہم اسٹریٹجک اور معاشی فیصلہ کرتے ہوئے چٹاگانگ میں قائم کیے جانے والے انڈین اکنامک زون کے منصوبے کو باضابطہ طور پر منسوخ کرنے کا اعلان کر دیا ہے۔
بنگلادیشی حکام کے مطابق اس منصوبے کی جگہ اب فوجی اور دفاعی صنعتوں کی صلاحیت بڑھانے کے لیے ایک نیا ڈیفنس اکنامک زون قائم کیا جائے گا۔
بنگلادیش اکنامک زونز اتھارٹی (BEZA) کے ایگزیکٹو چیئرمین چوہدری عاشق محمود بن ہارون نے ڈھاکا میں پریس کانفرنس کرتے ہوئے فیصلے کی تفصیلات سے آگاہ کیا۔ ان کا کہنا تھا کہ چٹاگانگ میں انڈین اکنامک زون کے قیام کا منصوبہ اب ختم کر دیا گیا ہے اور اس زمین کو دفاعی و عسکری صنعتوں کے فروغ کے لیے استعمال کیا جائے گا۔
چوہدری عاشق محمود کے مطابق یہ فیصلہ BEZA کے گورننگ بورڈ کے حالیہ اجلاس میں کیا گیا، جس میں ملک کی طویل المدتی معاشی اور دفاعی ضروریات کو مدنظر رکھا گیا۔ انہوں نے کہا کہ بنگلادیش اب اپنی فوجی اور دفاعی صنعتوں میں خود کفالت کی جانب بڑھنا چاہتا ہے، تاکہ نہ صرف ملکی دفاع مضبوط ہو بلکہ جدید دفاعی ٹیکنالوجی کے میدان میں بھی ترقی کی جا سکے۔
ان کا کہنا تھا کہ ڈیفنس اکنامک زون کے قیام سے مقامی سطح پر اسلحہ سازی، دفاعی سازوسامان اور متعلقہ ٹیکنالوجی کی تیاری میں اضافہ ہوگا، جس سے روزگار کے نئے مواقع بھی پیدا ہوں گے۔ حکام کے مطابق یہ منصوبہ ملکی معیشت کے ساتھ ساتھ قومی سلامتی کے لیے بھی اہم سنگ میل ثابت ہو سکتا ہے۔
ماہرین کا کہنا ہے کہ انڈین اکنامک زون کی منسوخی اور ڈیفنس اکنامک زون کے قیام کا فیصلہ خطے میں بدلتی ہوئی جیو پولیٹیکل صورتحال اور بنگلادیش کی اسٹریٹجک ترجیحات کی عکاسی کرتا ہے۔ بعض تجزیہ کاروں کے مطابق یہ اقدام بنگلادیش کی دفاعی خودمختاری کو مضبوط بنانے کی کوشش کا حصہ ہے۔
حکام نے مزید بتایا کہ ڈیفنس اکنامک زون کے خدوخال، سرمایہ کاری کے مواقع اور عملدرآمد کے طریقہ کار سے متعلق تفصیلات جلد جاری کی جائیں گی۔ اس فیصلے کے بعد خطے میں معاشی اور دفاعی سطح پر اس کے اثرات پر بھی گہری نظر رکھی جا رہی ہے۔
مزید پڑھیں۔قیامت قریب تر؟ ڈومز ڈے کلاک کا خطرناک الرٹ جاری
