سیالکوٹ ( اے بی این نیوز )پاکستان تحریک انصاف کے رہنما عمر ڈار کو سیالکوٹ میں احتجاجی ریلی کے دوران گرفتار کر لیا گیا۔ یہ ریلی عمران خان اور بشریٰ بی بی کو سنائی گئی سزا کے خلاف نکالی گئی تھی، جس کے دوران پولیس نے کارروائی کرتے ہوئے عمر ڈار کو حراست میں لے لیا۔
عمر ڈار کی گرفتاری پر ان کی والدہ ریحانہ ڈار نے سخت ردعمل دیا ہے۔ انہوں نے سماجی رابطے کی ویب سائٹ ایکس پر گرفتاری کی ویڈیو شیئر کرتے ہوئے کہا کہ ان کے بیٹے کو عمران خان اور بشریٰ بی بی کو دی گئی جعلی اور جھوٹی سزا کے خلاف آواز اٹھانے پر گرفتار کیا گیا ہے۔
ریحانہ ڈار کا کہنا تھا کہ یہ گرفتاری کسی ایک شخص کے خلاف نہیں بلکہ ہر اس آواز کے خلاف ہے جو جعلی فیصلوں، جھوٹے مقدمات اور مسلط کردہ نظام کو چیلنج کرتی ہے۔ انہوں نے کہا کہ جب عدالتوں کے فیصلے کمزور ہو جائیں، دلائل ختم ہو جائیں اور سچ سے خوف پیدا ہو جائے تو پھر گرفتاریاں، ہتھکنڈے اور دھمکیاں ہی آخری سہارا بن جاتی ہیں۔
انہوں نے مزید کہا کہ ظلم کے خلاف احتجاج کو بغاوت قرار دیا جا رہا ہے، مگر کارکنوں کو گرفتار کر لینے سے کوئی تحریک ختم نہیں کی جا سکتی۔ ان کے مطابق جتنا ظلم بڑھایا جائے گا، اس کے خلاف مزاحمت اتنی ہی مضبوط ہوتی جائے گی۔
ریحانہ ڈار نے واضح کیا کہ وہ عمران خان کے ساتھ پہلے بھی کھڑی تھیں، آج بھی کھڑی ہیں اور ہر قیمت پر کھڑی رہیں گی۔ عمر ڈار کی گرفتاری کے بعد سیاسی حلقوں میں ایک بار پھر کشیدگی بڑھتی دکھائی دے رہی ہے۔
مزید پڑھیں :حکومت نے پی ٹی آئی کو مذاکرات کی مشروط پیشکش کردی،جا نئے شرط بارے
