اسلام آ باد (نیوزڈیسک)ملتان میں گزشتہ روز الیکشن کمیشن آفس میں جھگڑے کے الزام میں گرفتار ن لیگ کے سابق ایم این اے اور کارکنوں کو تھانے میں وی آئی پی پروٹوکول دیا گیا جس کی وڈیو سامنے آگئی ہے۔ملزمان کو حوالات کے بجائے ایس ایچ او کے کمرے میں بٹھایا گیا، ساری رات ملاقاتوں کا سلسلہ بھی جاری رہا، گرفتار کارکنوں سے ملنے کیلئے آنے والے مٹھائی کے ٹوکرے بھی ساتھ لائے۔خیال رہے کہ ملتان میں عدالت نے الیکشن کمیشن آفس میں جھگڑے کا مقدمہ کمزور بنیادوں پر درج ہونے کے باعث خارج کر تے ہوئے تمام ملزمان کو رہا کرنے کا حکم دیدیا ہے۔پولیس کی جانب سے ملتان الیکشن کمیشن آفس میں جگھڑے کے بعد گرفتار کیے گئے پاکستان تحریک انصاف اور پاکستان مسلم لیگ ن کے کارکنان کو جوڈیشل مجسٹریٹ کی عدالت میں پیش کیا گیا، سول جج نے گرفتار تمام افراد کو فوری رہا کرنے کا حکم دیدیا۔الیکشن کمیشن کے دفتر میں ہنگامہ آرائی کے بعد ملتان پولیس نے کارروائی کرتے ہوئے پی ٹی آئی کے رہنما عامر ڈوگر سمیت 10 کارکنان جبکہ ن لیگ کے سابق رکن قومی اسمبلی رانا محمود الحسن اور ن لیگی امیدوار شیخ طارق رشید کو حراست میں لیا تھا۔بعد ازاں پولیس نے محمود الحسن کو رہا کر دیا تھا، اس حوالے سے پولیس نے مؤقف اپنایا تھا کہ جھگڑے کے وقت رانا محمود الحسن الیکشن کمیشن آفس میں موجود نہیں تھے۔
