کراچی(اے بی این نیوز)قومی کرکٹ ٹیم کے سابق کپتان شاہد خان آفریدی نے کہا ہے کہ انہوں نے سیاست سے دور رہنے کا فیصلہ کیا ہے۔ ایک ویڈیو پیغام میں آفریدی نے کہا کہ انہوں نے اپنا ذہن تبدیل کر لیا ہے اور اب وہ سیاست میں حصہ نہیں لیں گے۔

شاہد آفریدی نے مریم نواز کی تعریف کرتے ہوئے کہا کہ وہ پنجاب میں اچھا کام کر رہی ہیں، اور جو لوگ انہیں ٹک ٹاک ویڈیوز کے حوالے سے تنقید کا نشانہ بناتے ہیں، وہ کم از کم کام تو کر رہی ہیں۔ انہوں نے سیاست میں انٹری کے سوال پر کہا کہ ان کے لیے دعا کیجیے کہ وہ سیاست سے ہمیشہ دور رہیں، کیونکہ انہوں نے 2019 یا 2020 میں فیصلہ کیا کہ سیاست ان کا شعبہ نہیں۔

شاہد آفریدی سے سوال کیا گیا کہ سوشل میڈیا پر بعض افراد آپ سمیت ملک کے حقیقی ہیروز کے خلاف منفی مہم چلاتے ہیں، تو اس پر آفریدی نے کہا کہ اگر انہیں ان باتوں کی پرواہ ہوتی تو وہ کبھی بھی کوئی بات نہ کرتے۔ انہوں نے مزید کہا کہ سوشل میڈیا پر جھوٹ بول کر لائکس یا ویوز حاصل کرنا ان کا مقصد نہیں، اور نہ ہی سوشل میڈیا ان کے روزگار کا ذریعہ ہے۔

آفریدی نے بغیر کسی کا نام لیے کہا کہ کچھ لوگ ملک سے باہر بیٹھ کر اندرونِ ملک فتنہ پھیلا رہے ہیں۔ ان کا سوال تھا کہ یہ لوگ نوجوانوں کو کس سمت میں لے جانا چاہتے ہیں؟ انہوں نے ان افراد کو مخاطب کرتے ہوئے کہا کہ اگر وہ واقعی محبِ وطن ہیں تو پاکستان واپس آئیں اور یہاں آ کر انقلاب لائیں، لیکن نوجوانوں کو گمراہ نہ کریں اور جھوٹ بولنا چھوڑ دیں۔

مزید پڑھیں۔مسلم لیگ (ن) کے رہنما افتخار احمد چیمہ انتقال کر گئے