پشاور( اے بی این نیوز)گورنر کے پی فیصل کریم کنڈی نے علی امین گنڈا پور کے استعفیٰ کی تصدیق کردی۔
گورنر خیبرپختونخوا فیصل کریم کنڈی کو علی امین گنڈا پور کا استعفیٰ آج موصول ہوا، جسے وزیراعلیٰ کے معاون خصوصی برائے انسداد بدعنوانی بریگیڈیئر (ر) مصدق عباسی گورنر ہاؤس لے گئے۔
مصدق عباسی نے علی امین گنڈا پور کا استعفیٰ گورنر ہاؤس کے نگراں کو سونپ دیا اور نگراں نے استعفیٰ وصول کر کے رسید دے دی جب کہ استعفے کی وصولی میں ڈھائی بجے کا وقت بتایا گیا ہے۔
نجی ٹی وی سے خصوصی گفتگو کرتے ہوئے فیصل کریم کنڈی کا کہنا تھا کہ وزیراعلیٰ کا ہاتھ سے لکھا گیا استعفیٰ آج دوپہر ڈھائی بجے موصول ہوا جو کہ 11 اکتوبر کو ہے، استعفیٰ کی جانچ پڑتال اور قانونی تقاضے پورے ہونے کے بعد اس پر باقاعدہ عمل درآمد کیا جائے گا۔
انہوں نے کہا کہ میری لیگل ٹیم قانونی اور آئینی نکات پر استعفے کا جائزہ لے گی اور پھر آئینی اور قانونی نکات کے مطابق جائزہ لینے کے بعد فیصلہ کیا جائے گا۔
علی امین کے استعفے کے خط میں کہا گیا ہے کہ میں تصدیق کرتا ہوں کہ میں نے بطور وزیراعلیٰ استعفیٰ دیا ہے اور وفاداری کی بنیاد پر استعفیٰ دیا ہے۔
مزید پڑھیں:کے پی میں اپوزیشن کی حکومت بننے کے امکانات،رانا ثناءاللہ کا انکشاف
