ممبئی ( اے بی این نیوز) انڈین پریمیئر لیگ (آئی پی ایل) کی فرنچائز ممبئی انڈینز اور ہیڈ کوچ مہیلا جے وردھنے نے 2027 کی نیلامی سے قبل اپنی راہیں جدا کرلی ہیں۔
سری لنکا کے سابق کپتان مہیلا جے وردھنے گزشتہ دو سیزنز سے ممبئی انڈینز کے ہیڈ کوچ کی ذمہ داریاں نبھا رہے تھے۔ یہ فرنچائز کے ساتھ ان کی دوسری مدت تھی۔ اس سے قبل وہ 2017 سے 2022 تک بھی ٹیم کے ہیڈ کوچ رہ چکے ہیں۔
ممبئی انڈینز کی جانب سے جاری بیان میں مہیلا جے وردھنے نے فرنچائز کے ساتھ اپنے طویل تعلق کو یادگار قرار دیا۔ ان کا کہنا تھا کہ ممبئی انڈینز گزشتہ ایک دہائی سے زیادہ عرصے سے ان کے کرکٹ سفر کا اہم حصہ رہی ہے۔
انہوں نے کھلاڑیوں، کوچنگ اسٹاف، مداحوں اور ٹیم انتظامیہ کا شکریہ ادا کرتے ہوئے کہا کہ اس دوران کئی ناقابلِ فراموش لمحات گزرے اور انہیں مشترکہ کامیابیوں پر فخر ہے۔ جے وردھنے نے نیتا امبانی اور آکاش امبانی کا اعتماد، تعاون اور دوستی پر خصوصی شکریہ بھی ادا کیا۔
کرکٹ ویب سائٹ کرک انفو کی رپورٹ کے مطابق کوچنگ اسٹاف میں تبدیلی کا معاملہ اگست میں 2026 کے سیزن کا جائزہ لینے کے دوران سامنے آیا تھا۔ اس موقع پر ٹیم کے قائد کھلاڑیوں اور فرنچائز انتظامیہ نے اتفاق کیا کہ کوچنگ کے شعبے میں تبدیلی کی ضرورت ہے۔
رپورٹ کے مطابق مہیلا جے وردھنے بھی نئے اور نوجوان کوچز کو شامل کرنے کے حامی تھے تاکہ ٹیم کو تازہ خیالات اور نئے نقطہ نظر سے فائدہ پہنچ سکے۔
تاہم ممبئی انڈینز نے تاحال نئے ہیڈ کوچ کے نام کا اعلان نہیں کیا۔
مزید پڑھیں:بعض لوگ اپنا قد بڑھانے کے لیے ان پر تنقید کرتے ہیں، مولانا فضل الرحمان
