نیویارک(اے بی این نیوز) امریکا میں سکھوں کی بین الاقوامی تنظیم سکھس فار جسٹس نے بلوچستان میں جعفر ایکسپریس پر حملے کے حوالے سے بیان جاری کیا ہے۔سکھس فار جسٹس کے رہنما گروپتون سنگھ پنوں نے کہا ہے کہ بلوچستان میں ٹرین دہشت گردانہ حملے میں ’را‘ ملوث ہے۔
عالمی ادارہ بھارتی قومی سلامتی کے مشیر اجیت ڈوول اور ’’را‘‘ کے خلاف کارروائی کرے۔انہوں نے کہا کہ بھارت پاکستان کے خلاف خفیہ جنگی حکمت عملی کے بلیو پرنٹ پر عمل پیرا ہے۔
مودی کا ہندوستان صرف علاقائی خطرہ نہیں ہے بلکہ یہ ایک مکمل دہشت گرد حکومت ہے۔ مودی حکومت پرتشدد بین الاقوامی جبر میں مصروف ہے۔گروپتونت سنگھ نے مزید کہا کہ بلوچستان ٹرین حملہ بھارت کے جارحانہ دفاعی نظریے کا منہ بولتا ثبوت ہے۔ بھارت خفیہ دہشت گردی کی کارروائیوں کے ذریعے پڑوسی ممالک کو غیر مستحکم کرنا چاہتا ہے۔
بھارت بیرون ملک مخالفین کو قتل کرنے، انتہا پسندی اور سرحد پار دہشت گردی میں ملوث ہے۔انہوں نے مزید کہا کہ مودی نے بھارت کو ریاستی سرپرستی میں دہشت گردی کا عالمی مرکز بنا دیا ہے اور ’’را‘‘ کی بے قابو کارروائیاں جنوبی ایشیا کو خطرے میں ڈال رہی ہیں اور ریاستی تشدد کی ایک خطرناک عالمی مثال قائم کر رہی ہیں۔
رہنما سکھس فار جسٹس نے یہ بھی کہا کہ ہندوستان کے خفیہ اداروں پر سفارتی اور سیکورٹی پابندیاں عائد کی جانی چاہئیں اور دنیا اب ہندوستان کی خفیہ دہشت گردانہ سرگرمیوں پر آنکھیں بند نہیں کر سکتی۔گروپتون سنگھ پنوں نے یہ بھی کہا کہ اگر بھارت کو جوابدہ نہ ٹھہرایا گیا تو اس کا اگلا حملہ اس سے بھی زیادہ معصوم جانیں لے گا۔
مزید پڑھیں: جعفر ایکسپریس حملہ، پی ٹی آئی کے سوشل میڈیا نے دہشتگردوں کو کریڈٹ دیا،وزیر دفاع
