اسلام آباد(نیوزڈیسک)چینی مسلح افواج آئندہ 23 مارچ کو پاکستان کے قومی دن کی فوجی پریڈ میں شرکت کریں گی۔
یہ اعلان چین کی وزارت قومی دفاع کے ترجمان ژانگ ژیاؤگنگ نے اپنے ایک بیان میں کیا۔
ترجمان کے مطابق چینی پیپلز لبریشن آرمی (پی ایل اے) پاکستانی فوج کی دعوت پر یوم پاکستان پریڈ میں شرکت کے لیے مارچ کے وسط سے آخر تک ایک دستہ پاکستان بھیجے گا۔
یادرہے کہ یہ پہلا موقع نہیں ہے کہ چینی فوجی یوم پاکستان کی پریڈ میں شریک ہوں گے۔
مزیدپڑھیں:میرعلی بارود ،خود کش حملے میں لیفٹیننٹ کرنل، کیپٹن سمیت 7 اہلکار شہید
اس سے قبل 2017 میں بھی انہوں نے ایونٹ میں حصہ لیا تھا۔
ماضی میں سعودی عرب سمیت کئی دوسرے ممالک کے فوجی دستے بھی اس تقریب میں شرکت کر چکے ہیں۔
یوم پاکستان کے موقع پر مسلح افواج کی پریڈ کی تیاریاں گزشتہ ماہ شروع ہوئی تھیں۔
اس سے قبل وزارت دفاع نے پہلے ہی چاروں صوبوں، آزاد کشمیر اور گلگت بلتستان کی وزارتوں، ڈویژنوں اور چیف سیکریٹریز کو خطوط لکھ کر 15 فروری تک ان عہدیداروں کی فہرستیں طلب کی تھیں جنہیں یوم پاکستان پریڈ میں مدعو کیا جانا ہے۔
تقریب میں اعلیٰ حکومتی اور عسکری حکام کے علاوہ بیرونی ممالک کے حکام بھی شریک ہونگے۔
