لبنان (نیوزڈیسک)نائب سربراہ سیاسی بیورو حماس صالح العاروری کی پانچ ساتھیوں سمیت شہادت پر حماس میں سخت غم وغصے کی لہر دوڑ گئی ،حزب اللہترجمان کا کہنا تھا کہ اسرائیل کو صالح العاروری کی شہادت کی بھاری قیمت چکانی ہوگی ۔حزب اللہ ترجمان نے اپنے بیان میں کہا کہ سینئر رہنما صالح العاروری کی شہادت سے یمن، شام اور عراق کے سپورٹنگ محاذوں پر مزاحمت میں کسی قسم کی کوئی کمی نہیں آئے گی۔ بیروت مرکز میں حماس رہنما پر حملے کو لبنان کے عوام، سکیورٹی اور خودمختاری پر حملہ قراردیتے ہوئے ترجمان کا کہنا تھا کہ حملے کا اسرائیل کو بھرپور جواب دیا جائے گا۔اسرائیل کے گھنائونے جرائم کو نظرانداز نہیں کیا جائے گا بلکہ اس کا بھرپور بدلہ لیا جائے گا، ہمارے مزاحمت کار اپنے اصولوں، اپنے وعدوں اور اپنی کمٹمنٹ کو نبھانے کیلئے بندوقوں کے ٹرگر پر اپنی انگلیاں جما کر بیٹھے ہیں۔ حزب اللہ کے سربراہ حسن نصراللہ بھی آج اہم خطاب کریں گے۔دوسری جانب حماس رہنما اسماعیل ہنیہ نے اپنے بیان میں کہا کہ فتح اورآزادی تک جہاد جاری رہے گا۔لبنان کے وزیراعظم نجیب میقاتی نے اپنے بیان میں کہا کہ اسرائیل غزہ میں ناکامی کے بعد لبنان کو محاذ آرائی کے نئے مرحلے میں لے جانا چاہتا ہے۔انہوں نے کہا کہ لبنان اسرائیلی حملوں کے خلاف اقوام متحدہ کی سلامتی کونسل میں شکایت کرے گا۔ایران نے بھی اسرائیل کو خبردار کردیا ہے کہ حماس رہنما کا قتل اسرائیل کے خلاف مزاحمت مزید بڑھائے گا۔اقوام متحدہ کا کہنا تھا کہ حماس رہنما کی ہلاکت کے بعد صورتِحال انتہائی پریشان کُن ہوچکی ہے ۔
