اسلام آباد(نیوزڈیسک) ملک بھر میں آج صبح چار بجے سے شدید دھند ، اسلام آباد اور اس کے گردو نواح میں شدید دھند کے باعث ٹریفک کی روانی متاثر ، محکمہ موسمیات کے مطابق ملک کے بیشتر حصوں میں آج موسم سرد رہنے کا امکان ہے ، بلوچستان کے مغربی اضلاع میں بارش کاامکان ہے جبکہ ملک بھر میں موسم خشک اور سرد رہےگا ، خیبرپختونخوا کے بالائی علاقے شدید سردی کی لپیٹ میں رہیں گے ، چارسدہ، مردان، نوشہرہ، صوابی، پشاور، ڈی آئی خان اور گردونواح میں صبح اور رات کے اوقات میں دھند رہے گی۔پنجاب کے بیشتر اضلاع میں موسم سرد اور خشک جبکہ مری، گلیات اور گردونواح میں شدید سرد اور مطلع جزوی ابر آلود رہے گا۔بہاولپور، ساہیوال، اوکاڑہ، قصور، لاہور، سیالکوٹ، نارووال، گوجرانوالہ، جہلم، منگلا، فیصل آباد، جھنگ، سرگودھا، منڈی بہاؤالدین، ٹوبہ ٹیک سنگھ، خانیوال، ملتان، خان پور، رحیم یار خان، حافظ آباد، بھکر، لیہ، ڈیرہ غازی خان اور گر دو نواح میں شدید دھند رہے گی، خطہ پوٹھوہار کے بعض علاقوں میں بھی صبح اور رات کے اوقات میں دھند چھائی رہے گی۔
