اسلام آباد(اے بی این نیوز)وفاقی وزیر برائے موسمیاتی تبدیلی و ماحولیاتی رابطہ سینیٹر شیری رحمان نے کہا ہے کہ پاکستان دنیا بھر میں پناہ گزینوں کے ساتھ غیر متزلزل یکجہتی کا اظہار کرتے ہوئے ہماری سرحدوں کے اندر پناہ لینے والوں کو مدد اور تحفظ فراہم کرنے کے اپنے عزم کا اعادہ کرتا ہے۔ منگل کو پناہ گزینوں کے عالمی دن کے موقع پر اپنے ایک ٹویٹ میں انہوں نے کہا کہ کئی دہائیوں سے لاکھوں افغان مہاجرین کے دیرینہ میزبان کے طور پر، پاکستان کو عالمی سطح پر مہاجرین کی میزبانی کرنے والے سب سے بڑے ممالک میں سے ایک ہونے کا اعزاز حاصل ہے۔ انہوں نے کہا کہ ہماری قوم نے درپیش معاشی اور سماجی چیلنجوں کے باوجود اشد ضرورت مندوں کو پناہ دے کر بے مثال سخاوت کا مظاہرہ کیا ہے، عالمی برادری کو پناہ گزینوں کے بحران سے نمٹنے میں پاکستان کے اہم کردار کا اعتراف کرتے ہوئے سراہنا چاہیے۔ انہوں نے کہا کہ آئیے سب ساتھ مل کر ایک زیادہ جامع اور ہمدرد دنیا کے لیے کوشش کریں۔
