اسلام آباد (اے بی این نیوز ) وزیرِ اعظم محمد شہباز شریف سے ملکی مایہ ناز کاروباری شخصیات کے وفد کی وزیرِ اعظم ہاؤس میں ملاقات۔ ملکی کاروباری برادری کا وزیرِ اعظم شہباز شریف کی قیادت میں حکومت کی پالیسیوں پر اعتماد کا اظہار، کاروباری برادری و سرمایہ کاروں کیلئے سازگار ماحول فراہم کرنے پر خراج تحسین۔ وزیرِاعظم نے کہا کہ آپ سب کی آمد کا خیر مقدم کرتا ہوں۔
مخلص اور دیانتدار کاروباری برادری ہمارا قیمتی اثاثہ ہے۔ آپ سب نے مشکل وقت میں بھی ملکی صنعتی و معاشی ترقی کیلئے اپنا سرمایہ اس ملک میں لگایا۔ آپ کی کاوشوں کی بدولت ملک کی معیشت کا پہیہ چلا، لوگوں کو روزگار ملا۔
آپ کی مشاورت اور مفید آراء سے ملکی معیشت کو بہتری اور تمام شعبوں میں اصلاحات کا سفر جاری رکھیں گے۔ الحمدللہ ملکی معیشت صحیح سمت کی طرف گامزن ہے۔ شرح سود اور مہنگائی کی شرح میں خاطر خواہ کمی آ چکی۔
حکومت ملک میں کاروباری سرگرمیوں اور سرمایہ کاری کیلئے ساز گار ماحول فراہم کر رہی ہے۔ سرمایہ کاری کا سفر مقامی سرمایہ کاروں سے شروع ہوتا ہے۔ مشاورت کا مقصد ملک کی معیشت کی ترقی میں تیزی لانا ہے۔
بیرون ملک تعینات ٹریڈ آفسیرز کو تجارت و برآمدت کے فروغ کے حوالے سے واضح اہداف فراہم کئے جا چکے۔ اجلاس میں شرکاء نے حکومت کی کاروبار دوست پالیسیوں پر مکمل اعتماد کا اظہار کیا۔
شرکاء نے ملک میں زراعت کی ترقی کیلئے معیاری بیج کی فراہمی کو یقینی بنانے کے حوالے سے نیشنل سیڈ ڈویلپمنٹ اتھارٹی کے قیام پر حکومت کو خراج تحسین پیش کیا۔ شرکاء نے حکومت کے گرین پاکستان انیشی ایٹیو کی بھی تعریف کی۔
حکومت کی پالیسیوں کی بدولت ملکی آئی ٹی کی صنعت دنیا میں تیزی سے اپنا مقام بنا رہی ہے۔شرکاء نے مختلف شعبوں کے حوالے سے تجاویز بھی پیش کیں. وزیرِ اعظم کی تمام متعلقہ وزارتوں کو کاروباری شعبوں کے نمائندوں و اسٹیک ہولڈرز سے ملاقات کرکے ان سے مشاورت کرنےکی ہدایت کی.
وفد میں گوہر اعجاز، سید یاور علی، عاطف شیخ، فواد مختار، شاہد حسین، ایس ایم تنویر، میاں احسن، سلیم غوری، شہزاد ملک، عثمان ملک، عاطف انعام اور شہزاد اصغر شریک تھے. اجلاس میں وفاقی وزراء احسن اقبال، رانا تنویر حسین، احد خان چیمہ، جام کمال خان، محمد اورنگزیب، عطاء اللہ تارڑ، علی پرویز ملک، حنیف عباسی، وزیرِ مملکت بلال اظہر کیانی، معاون خصوصی ہارون اختر، وزیرِ اعظم کے کوارڈینیٹر رانا احسان افضل، چیئرمین ایف بی آر راشد محمود لنگڑیال اور متعلقہ اعلی حکام نے شرکت کی۔
مزید پڑھیں :امریکہ تاریخی طور پر پاکستان کا اسٹریٹجک پارٹنر رہا ہے، رانا ثناءاللہ
