شکار پور( نیوز ڈیسک )سندھ کے شہر شکارپور میں اتوار کی صبح انڈس ہائی وے پر مڈگی ٹاؤن تھانے کے قریب ڈاکو مسافروں سے نقدی، موبائل فون اور موٹر سائیکلیں لوٹ کر فرار ہو گئے۔
ڈکیتی کی واردات کے کچھ دیر بعد متاثرہ مسافروں نے انڈس ہائی وے پر احتجاجی ریلی اور دھرنا دیا۔ ان کے احتجاج کے باعث شاہراہ پر ٹریفک مکمل طور پر مسدود ہو گئی جس کی وجہ سے کافی خلل پڑا۔
شکارپور، لاڑکانہ اور جیکب آباد کے درمیان ٹریفک بھی معطل ہو گئی جس سے متعدد مسافر پھنس کر رہ گئے اور انہیں شدید مشکلات کا سامنا کرنا پڑا۔مظاہرین نے پولیس سے مطالبہ کیا کہ ڈاکوؤں کے خلاف فوری اور فیصلہ کن کارروائی کی جائے۔انہوں نے حکام پر زور دیا کہ وہ ان کے چوری شدہ سامان بشمول نقدی، موبائل فونز اور موٹر سائیکلوں کی واپسی کو یقینی بنائیں۔
مزید پڑھیں: سندھ بھر میں میں سی این جی اسٹیشن بند کرنے کا اعلان
