سرینگر(نیوزڈیسک) قابض انتظامیہ نے غیر قانونی طور پرمقبوضہ جموں و کشمیر میں صورتحال کو قابو میں رکھنے کیلئے پیپلز ڈیموکریٹک پارٹی کی صدر محبوبہ مفتی اور نیشنل کانفرنس کے نائب صدر عمر عبداللہ کوسرینگر میں اپنے گھروں میں نظر بند کر دیا ۔کشمیر میڈیا سروس کے مطابق پی ڈی پی کی طرف سے سرینگر میں جاری بیان میں کہا گیا کہ محبوبہ مفتی کو ان کی رہائش گاہ پر نظر بند کر دیا گیا ہے۔انہیں بھارت مخالف احتجاجی ریلیوں کی قیادت سے روکنے کیلئے ان کے گھر کے باہر پولیس تعینات کر دی گئی ہے۔پی ڈی پی نے سوشل میڈیا پر جاری ایک بیان میں کہاکہ سپریم کورٹ کے فیصلے سے قبل پولیس نے پی ڈی پی صدر محبوبہ مفتی کی رہائشگاہ کے دروازے سیل کر دیئے اور انہیں غیر قانونی طور پر نظر بند کر دیا ۔دریں ثناء قابض بھارتی فوج اور پولیس نے گزشتہ روزکل جماعتی حریت کانفرنس کے سینئر رہنما اور جموں و کشمیر پیس فورم کے چیئرمین ایڈووکیٹ دیویندر سنگھ بہل کے گھر پر مشترکہ طور دھاوا بول دیا ۔دیویندر سنگھ بہل اس وقت گھر پر موجود نہیں تھے ۔پارٹی ترجمان نے ایک بیان میں کہا کہ بھارتی فوجیوں نے نہ صرف چادر اور چار دیواری کا تقدس پامال کیا بلکہ مکینوں کو ہراساں کیا گیا ۔ انہوں نے کہا کہ قابض فوجیوں نے بھارتی سپریم کورٹ کے حوالے سے حریت رہنما ایڈووکیٹ دیویندر سنگھ بہل کے بیان پر انہیں ہراساں کرنے کیلئے یہ کارروائی کی۔ فورم کے ترجمان نے کہا کہ یہ واضح ہے کہ مقبوضہ جموں و کشمیر اور بھارت میں اظہار رائے کی آزادی نہیں ہے اور بھارت کشمیریوں کی آواز کو دبانے کیلئے اوچھے ہتھکنڈے استعمال کررہی ہے جس کی جتنی بھی مذمت کی جائے کم ہے۔
