اسلام آباد ( اے بی این نیوز )مولانا فضل الرحمان نے کہا کہ سپریم کورٹ سیاسی جماعتوں کو مجبور کر رہی تھی کہ بات چیت کریں، ہم جو بات کریں گے سیاسی زاویے سے کریں گے، ہمارے نزدیک سینیٹ آف پاکستان فیڈریشن کی نمائندگی کرتا ہے۔اسلام آباد میں پریس کانفرنس کرتے ہوئے مولانا فضل الرحمان نے کہا کہ کل وزیراعظم کی صدارت میں حکمراں جماعتوں کے سربراہان کا اجلاس ہوا، اس اجلاس کا موضوع پی ٹی آئی سے مذاکرات تھا۔انہوں نے کہا کہ ہماری نظر وفاقِ پاکستان پر ہے جو آئین کا بنیادی ڈھانچہ ہے، بنیادی ڈھانچے کا ایک بھی حصہ گرے تو پوری عمارت گرتی ہے۔سربراہ پی ڈی ایم نے کہا کہ ہم نے وزیراعظم کے سامنے اپنا موقف رکھا، وزیراعظم نے کہا ٹھیک ہے پھر ہم سینیٹ میں بیٹھ کر بات کر لیتے ہیں۔پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمان کا کہنا ہے کہ پی ٹی آئی سے مذاکرات کیوں کیے جائیں، اس کی بنیاد کیا ہے؟
