راولپنڈی(نیوز ڈیسک) عوامی مسلم لیگ کے سربراہ سابق وفاقی وزیر شیخ رشید نے کہا کہ جو منی بل منظور نہیں کراسکی وہ حکومت ختم ، صدر عارف علوی حکومت کو اعتماد کا ووٹ لینے کا کہیں،کل کا دن تاریخی ہوگا، قانون کی فتح ہوگی ،جو عدلیہ سے ٹکرائے گا پاش پاش ہوجائے گا۔سماجی رابطے کی ویب سائٹ ٹویٹر پر اپنے بیان میں عوامی مسلم لیگ کے سربراہ شیخ رشید نے کہا کہ جو حکومت منی بل منظور نہیں کراسکی وہ ختم ہوچکی ہے، صدرمملکت آرٹیکل اکانوے کلاز 7 کے تحت حکومت کو فوری اعتماد کا ووٹ لینے کا کہیں ،اسحاق ڈار ہمشہ غلط اعداد و شمار پہنچا کر آئی ایم ایف کو بیوقوف بنانے کی ناکام کوشش کرتے ہیں اس دفعہ اعداد و شمار کی ٹمپرنگ میں رنگے ہاتھوں پکڑے گئے ہیں، سماجی اقتصادی اور سیاسی تباہی کا حل صرف الیکشن میں ہیں، الیکشن ہوں گے تو امداد بھی مل جائے گی، الیکشن سارے ہونے ہیں یا پنجاب کے ہو کر رہیں گے، سپریم کورٹ رولزاینڈ پروسیجربل پر پہلے ہی اسٹے آرڈر دے چکی ہے۔ انہوں نے کہا کہ کل کا دن اہم اور تاریخی ہوگا، عدلیہ آئین اورقانون کی فتح ہوگی جو بھی عدلیہ سے ٹکرائے گا پاش پاش ہوجائے گا، وزیراعظم نے الیکشن فنڈ جاری نہ کرکے آئین شکنی کی وہ سیاسی قربانی کا بہانہ تلاش کر رہے ہیں،مریم نواز آج اکیلی پاکستان پہنچ جائیں گی اور نواز شریف لندن چلےجائیں گے، ویڈیو آڈیو ٹیپینگ سے حکومت خود بے نقاب ہورہی ہے۔
