اسلام آباد(اے بی این نیوز) پاکستان میں جیکو نے اپنی سب سے سستی ہائبرڈ ایس یو وی جے 5 متعارف کرا دی ہے، نشات گروپ کی معاونت سے لانچ کی گئی یہ گاڑی سیڈان اور ایس یو وی کے درمیان قیمت کے فرق کو کم کرنے کی کوشش قرار دی جا رہی ہے، جس میں جدید ٹیکنالوجی، بہتر فیول ایوریج اور پریمیم سہولیات کو نسبتاً مناسب قیمت میں پیش کیا گیا ہے۔
جیکو جے 5 ایک سیلف چارجنگ ہائبرڈ ہے جس میں ایک اعشاریہ 5 لیٹر ٹربو پیٹرول انجن کو ایک اعشاریہ 83 کلو واٹ آور بیٹری کے ساتھ جوڑا گیا ہے،یہ گاڑی دو ویرینٹس میں دستیاب ہے، جن میں کمفرٹ اور پریمیم شامل ہیں۔
جیکو جے 5 کا فرنٹ خاص طور پر رینج روور ایووَک سے مشابہ دکھائی دیتا ہے، واٹر فال اسٹائل فرنٹ گرِل، ایل ای ڈی ہیڈلائٹس، 18 انچ الائے ویلز، روف ریلز، چھپے ہوئے ڈور ہینڈلز اور جدید بمپر اسے مہنگی ایس یو ویز جیسی روڈ پریزنس دیتے ہیں۔
گاڑی میں مناسب بوٹ اسپیس موجود ہے، اگرچہ اسپیئر وہیل کی بجائے ٹائر ریپئر کٹ فراہم کی گئی ہے، پریمیم ویرینٹ میں پاورڈ ٹیل گیٹ اور 60:40 اسپلٹ ریئر سیٹس عملی استعمال کو مزید بہتر بناتے ہیں۔
اندرونی حصے میں ڈوئل ٹون گرے کلر اسکیم، سوفٹ ٹچ میٹیریل اور کاربن فائبر طرز کی ٹرم استعمال کی گئی ہے، کیبن میں 36 رنگوں کی ایمبینٹ لائٹنگ اور جدید ڈیش بورڈ ڈیزائن موجود ہے، جس کی وجہ سے یہ بی سیگمنٹ ایس یو وی ہونے کے باوجود کشادہ محسوس ہوتی ہے۔
گاڑی میں 13.2 انچ ٹچ اسکرین انفوٹینمنٹ سسٹم دیا گیا ہے، اس کے ساتھ وائرلیس ایپل کار پلے، اینڈرائیڈ آٹو اور 8 انچ ڈیجیٹل انسٹرومنٹ کلسٹر بھی شامل ہے۔
اس میں 6 ایئر بیگز، 540 ڈگری کیمرا سسٹم، فرنٹ کولیژن وارننگ، ایمرجنسی بریکنگ، ایڈاپٹو کروز کنٹرول، لین ڈیپارچر وارننگ، بلائنڈ اسپاٹ مانیٹرنگ، ریئر کراس ٹریفک الرٹ اور ڈرائیور فیٹیگ مانیٹرنگ جیسی جدید خصوصیات دی گئی ہیں، گاڑی 221 ہارس پاور اور 295 نیوٹن میٹر ٹارک پیدا کرتی ہے۔
کمپنی کے مطابق اس کی فیول ایوریج تقریباً 18 کلومیٹر فی لیٹر ہے، جبکہ 51 لیٹر کے فیول ٹینک کے ساتھ ایک بار فل ہونے پر 950 کلومیٹر تک کا سفر ممکن ہو سکتا ہے، تاہم اصل ایوریج کا اندازہ عملی استعمال کے بعد ہی ہو سکے گا۔
پاکستانی مارکیٹ میں جیکو جے 5 کو سب سے سستی ہائبرڈ ایس یو وی کے طور پر پیش کیا گیا ہے، کمفرٹ ویرینٹ کی قیمت 66 لاکھ 99 ہزار روپے جبکہ پریمیم ویرینٹ کی قیمت 76 لاکھ 99 ہزار روپے مقرر کی گئی ہے۔
یہ تعارفی قیمتیں 10 مارچ 2026 تک برقرار رہیں گی، خریداروں کے لیے ایم سی بی کے ذریعے فنانسنگ کی سہولت بھی فراہم کی گئی ہے، جس کے تحت ماہانہ اقساط ایک لاکھ 6 ہزار 542 روپے سے شروع ہوتی ہیں، جو قرض کی مدت اور شرائط پر منحصر ہیں۔
مزید پڑھیں۔تیاری کر لیں، موسم کے بارے میں اہم پیشگوئی سامنے آ گئی
