اسلام آباد ( اے بی این نیوز  )عازمینِ حج 2026 کے لیے لازمی تربیت کے پہلے مرحلے کا باقاعدہ شیڈول جاری کر دیا گیا ہے، جس کا آغاز یکم جنوری سے ہوگا۔ترجمان وزارتِ مذہبی امور کے مطابق عازمینِ حج 2026 کی لازمی تربیت کا پہلا مرحلہ یکم جنوری کو اسلام آباد سے شروع کیا جا رہا ہے۔ تربیتی شیڈول سے متعلق معلومات موبائل ایپ پاک حج 2026 اور ایس ایم ایس کے ذریعے عازمین کو فراہم کی جا رہی ہیں، جبکہ مکمل تفصیلات وزارتِ مذہبی امور کی سرکاری ویب سائٹ پر بھی دستیاب ہیں۔

جاری شیڈول کے مطابق 2 جنوری کو ایبٹ آباد، 3 جنوری کو گھوٹکی، ٹھٹھہ اور کوٹلی آزاد کشمیر میں حج تربیتی پروگرام منعقد ہوں گے۔ 4 جنوری کو میرپور آزاد کشمیر، ٹنڈو محمد خان اور خیرپور سندھ میں عازمین کو تربیت دی جائے گی۔اسی طرح 5 جنوری کو راولا کوٹ، بدین اور نوشہرو فیروز میں حج تربیتی کیمپس لگائے جائیں گے، جبکہ 6 جنوری کو فتح جنگ، دادو اور تھرپارکر کے علاقے مٹھی میں عازمین کو مناسکِ حج سے متعلق آگاہی فراہم کی جائے گی۔

ترجمان کے مطابق 7 جنوری کو عمرکوٹ، لاڑکانہ اور ہری پور، جبکہ 8 جنوری کو میرپور خاص، شہداد کوٹ اور مانسہرہ میں ایک روزہ حج تربیتی پروگرامز منعقد ہوں گے۔ یہ تربیتی سلسلہ مرحلہ وار ملک بھر میں تحصیل کی سطح پر فروری تک جاری رہے گا۔وزارتِ مذہبی امور نے عازمینِ حج کو ہدایت کی ہے کہ وہ تربیتی پروگرام میں شرکت کے وقت اصل قومی شناختی کارڈ اور حج درخواست کی کمپیوٹرائزڈ رسید ہمراہ رکھیں اور اپنے طے شدہ شیڈول کے مطابق لازمی تربیت میں شرکت یقینی بنائیں۔

مزید پڑھیں  :نئے سال کی آمد،خوشخبری،سونا،چاندی اپ ڈیٹ آگئی