اسلام آباد ( اے بی این نیوز )پرائیویٹ حج عازمین کے لیے خوشخبری سامنے آ گئی ہے، رواں سال کوئی بھی پرائیویٹ حاجی حج سے محروم نہیں رہے گا۔ذرائع کے مطابق پرائیویٹ حج آپریٹرز نے حکومتی ڈیڈ لائن سے قبل تمام عازمین کی بکنگ مکمل کر لی ہے۔ حکام کا کہنا ہے کہ نجی حج آرگنائزرز نے عازمین حج کی 100 فیصد رقم بروقت سعودی عرب منتقل کر دی، جس کے بعد رہائش، کھانے پینے اور دیگر تمام ضروری سہولیات کی ادائیگیاں بھی مکمل کر لی گئی ہیں۔
ذرائع کے مطابق پرائیویٹ عازمین کے لیے منیٰ میں رہائش کی بکنگ بھی کرالی گئی ہے، جس سے حج انتظامات سے متعلق تمام بڑے خدشات ختم ہو گئے ہیں۔واضح رہے کہ گزشتہ سال بروقت رقوم منتقل نہ ہونے کے باعث 63 ہزار سے زائد پرائیویٹ عازمین حج سے محروم رہ گئے تھے، جس پر شدید عوامی ردعمل سامنے آیا تھا۔ اسی پس منظر میں حکومت نے رواں سال پرائیویٹ حج آپریٹرز کے لیے سخت نگرانی اور واضح ڈیڈ لائن مقرر کی تھی۔
حکومت نے نجی حج آپریٹرز کو 31 دسمبر تک تمام مالی اور انتظامی معاملات مکمل کرنے کی ہدایت دی تھی، جس پر پرائیویٹ حج آرگنائزرز نے مقررہ وقت سے پہلے تمام تقاضے پورے کر لیے۔حکام کے مطابق بروقت انتظامات سے نہ صرف عازمین حج کو سہولت ملے گی بلکہ گزشتہ سال پیش آنے والی مشکلات کے اعادے کو بھی یقینی بنایا جا سکے گا۔
مزید پڑھیں :ایم ٹیگ پوائنٹس میں اضافہ
