اسلام آباد ( اے بی این نیوز )پاکستان نے عالمی مالیاتی فنڈ (آئی ایم ایف) کے وفد کے دورے کی مصروفیات کو منظر عام پر نہ لانے کا فیصلہ کیا ہے۔ وزارت خزانہ کے ذرائع کے مطابق آئی ایم ایف وفد کا کوئی تحریری شیڈول جاری نہیں کیا جائے گا، اور ملاقاتوں کی معلومات متعلقہ محکمے کو فون پر فراہم کی جائیں گی۔
آئی ایم ایف کا وفد گزشتہ روز پاکستان پہنچا تھا اور وہ گڈ گورننس اور کرپشن کے حوالے سے پاکستانی حکام سے بات چیت کرے گا۔ اس کے علاوہ، وفد 2025-26 کے بجٹ تجاویز کا جائزہ لے گا اور گورننس کے حوالے سے تکنیکی معاونت پر فالو اپ مذاکرات کرے گا۔ وزارت خزانہ کے ذرائع کے مطابق، وفد آئندہ مالی سال کے ٹیکس ریونیو اقدامات اور اخراجات پر کنٹرول کے بارے میں پاکستانی حکام سے مذاکرات کرے گا تاکہ بجٹ کو حتمی شکل دی جا سکے۔
