اسلام آباد ( اے بی این نیوز ) اپنے گھر میں مردہ پائے گئے آسکر ایوارڈ یافتہ اداکار جین ہیک مین اور انکی اہلیہ کی موت کی وجہ سامنے آ گئی ۔غیرملکی میڈیاکی رپورٹس کے مطابق ہالی ووڈ اداکار جین ہیک مین اور ان کی اہلیہ کی موت طبعی تھی۔ 95 سالہ اداکار جین ہیک مین اور ان کی اہلیہ کی لاش 26 فروری کو نیو میکسیکو میں واقع ان کے گھر سے ملی تھی۔

چیف میڈیکل ایگزامینر کے مطابق جین ہیک مین کی موت ہائی بلڈ پریشر اور دل کی بیماری کے باعث ہوئی جبکہ الزائمر کی بیماری نے بھی ان کی صحت پر اثر ڈالا تھا جبکہ ان کی 65 سالہ اہلیہ بیٹسی اراکاوا ہانٹا وائرس پلمونری سنڈروم سے ہلاک ہوئیں جو چوہوں کے فضلے سے پھیلنے والی ایک بیماری ہے۔

حکام کے مطابق بیٹسی اراکاوا 11 فروری کو چل بسی تھیں جبکہ جین ہیک مین کی موت ممکنہ طور پر 18 فروری کو ہوئی۔تحقیقات کے مطابق جین ہیک مین الزائمر کے باعث شاید یہ سمجھ نہیں سکے کہ ان کی اہلیہ کی موت ہو چکی ہے، ان کی لاش کمرے میں ملی جبکہ بیٹسی اراکاوا کی لاش باتھ روم میں پائی گئی تھی۔ واضح رہے کہ متعدد فلموں میں اداکاری کے جوہر دکھانے والے ہیک مین نے 2004ء میں فلمی دنیا کو خیرباد کہہ دیا تھا،وہ اپنی اہلیہ بیٹسی اراکاوا کے ساتھ نیو میکسیکو میں رہ رہے تھے۔