اسلام آباد(نیوزڈیسک)پاکستان میں گزشتہ روز بجلی کے طویل بریک ڈائون کے بعد پٹرول اور ڈیزل کی قلت کے حوالے سے سوشل میڈیا پر قیاس آرائیوں کو آئل اینڈ گیس ریگولیٹری اتھارٹی (اوگرا) نے مسترد کرتے ہوئے پیٹرول اور ڈیزل کی قلت سے متعلق قیاس آرائیوں کی تردید کر دی۔ ترجمان اوگرا کا کہنا ہے کہ ملک بھر میں پیٹرول اور ڈیزل کا وافر ذخیرہ موجود ہے۔ عمران غزنوی کا کہنا ہے کہ ملک میں بالترتیب 18 اور 37 دنوں کی مانگ کو پورا کرنے کے لیے پیٹرول و ڈیزل کے ذخائر دستیاب ہیں۔انہوں نے کہا کہ پیٹرول کے 1 لاکھ 1 ہزار میٹرک ٹن کے حامل بحری جہاز برتھ پر ہیں۔ترجمان کا یہ بھی کہنا ہے کہ مقامی ریفائنریز پیٹرولیم کی مصنوعات کی طلب کو پورا کرنے میں بھرپور کردار ادا کر رہی ہیں۔واضح رہے کہ گزشتہ روز پیٹرولیم ڈیلرز ایسوسی ایشن نے کہا تھا کہ بجلی کے بریک ڈاؤن کے باعث پیٹرول اور ڈیزل کی مانگ میں اضافہ ہوا ہے۔ذرائع کا کہنا تھا کہ ملک کے مختلف شہروں میں تقریباً 50 فیصد پیٹرول پمپس پر پیٹرول اور ڈیزل ختم ہو چکا ہے۔