اسلام آباد(نیوز ڈیسک )کیپٹل ڈویلپمنٹ اتھارٹی (سی ڈی اے) کی جانب سے پی ٹی آئی کے مرکزی دفتر پر مبینہ تجاوزات کے خلاف آپریشن کے بعد حکومت اور پاکستان تحریک انصاف (پی ٹی آئی) کے درمیان محاذ آرائی ایک بار پھر شدت اختیار کر گئی ہے۔
مزید پڑھیں: آ ج25مئی بروز ہفتہ 2024پاکستان کے مختلف شہروں میں موسم کیسا رہے گا ؟
اس کے جواب میں پی ٹی آئی رہنماؤں نے اپنے پارٹی سیکرٹریٹ کے باہر خیمہ لگا دیا ہے جسے جزوی طور پر گرا کر سیل کر دیا گیا ہے۔کیمپ سے صحافیوں سے بات کرتے ہوئے پی ٹی آئی کے چیئرمین بیرسٹر گوہر نے کہا کہ معاملے کے حوالے سے ہائی کورٹ میں درخواست دائر کر دی ہے، عمر ایوب نے آخری دم تک لڑنے کا عزم ظاہر کیا۔
پی ٹی آئی کے سینئر رہنما شبلی فراز نے طنزیہ لہجے میں کہا کہ دفتر گراؤ، نشان چھین لو لیکن آپ ہمیں ڈرا نہیں سکتے۔دوسری جانب وزیر قانون اعظم نذیر تارڑ نے کہا کہ مبینہ تجاوزات کے خلاف آپریشن حکومت کا نہیں بلکہ سی ڈی اے کا فیصلہ ہے۔
یہ معاملہ اسلام آباد میں سی ڈی اے کے آپریشن سے شروع ہوا، جس کے دوران پی ٹی آئی سیکرٹریٹ کے باہر قائم مبینہ تجاوزات کو مسمار کر دیا گیا۔ پی ٹی آئی رہنما عامر مغل اور دیگر نے مزاحمت کی جس کے نتیجے میں انہیں گرفتار کر لیا گیا۔
