سری نگر(نیوزڈیسک) کشمیر پر قابض بھارتی فوج کا مقبوضہ کشمیر کے مختلف اضلاع میں نام نہاد فوجی آپریشن شروع۔میڈیا کے مطابق وادی کشمیر کو جموں کے مسلم اکثریتی علاقوں سے ملانے والے پہاڑی سلسلے پیر پنجال کے دونوں اطراف آپریشن کو’’شکتی‘‘ کا نام دیا گیا ۔فوجی آپریشن بیک وقت شوپیاں اور پلوامہ اضلاع ، ہمالیہ کے نشیبی اضلاع راجوری اور پونچھ میں شروع کردیا جس کا مقصد وادی کشمیر کے علاوہ جموں میں آزادی کی حامی آوازوں کو دبانا ہے۔مقبوضہ کشمیر میں بھارتی فورسز اور بدنام زمانہ بھارتی ایجنسیوں نے بھارتی یوم جمہوریہ سے چند دن قبل پورے مقبوضہ علاقے میں محاصرے اور تلاشی کی کارروائیوں اور گھروں پر چھاپوں کاسلسلہ تیز کردیا ۔ کل جماعتی حریت کانفرنس کی آزاد کشمیر شاخ نے مقبوضہ علاقے میں بھارتی فوج کی طرف سے جاری قتل و غارت، گرفتاریوں، خواتین کی بے حرمتی اور املاک کی تباہی کی شدید مذمت کی۔
