پاک فوج کے شعبہ تعلقات عامہ (آئی ایس پی آر) نے کہا ہے کہ 9 مئی کے واقعات کے ماسٹر مائنڈز اور منصوبہ سازوں کو آئین و قانون کے مطابق سزا ملنا مکمل انصاف کا مظہر ہوگا۔ آئی ایس پی آر کے مطابق، فوجی عدالتوں نے 9 مئی کے تشدد میں ملوث 25 ملزمان کو سزائیں سنائی ہیں، جو اس بات کا غماز ہے کہ قانون کی عملداری کو ہر صورت برقرار رکھا جائے گا۔ ان سزاؤں کا مقصد سیاسی پروپیگنڈے کا شکار افراد کو یہ پیغام دینا ہے کہ قانون کو ہاتھ میں لینا کسی صورت برداشت نہیں کیا جائے گا۔
بیان میں مزید کہا گیا کہ 9 مئی کے پُرتشدد واقعات پاکستان کی تاریخ کا ایک سیاہ باب ہیں، جن میں مسلح افواج کی تنصیبات پر منظم حملے اور بے حرمتی کی گئی۔ آئی ایس پی آر نے اس بات پر زور دیا کہ یہ تشدد کی بنیاد پر کی جانے والی سیاست کو دفن کرنے کی کوشش ہے، اور آئین و قانون کی حکمرانی کو یقینی بنایا جائے گا۔ 9 مئی کے ان افسوسناک واقعات میں ملوث افراد کے خلاف تمام شواہد اکٹھے کیے گئے ہیں، اور فیلڈ جنرل کورٹ مارشل سمیت دیگر قانونی طریقوں کے ذریعے ان کا محاسبہ کیا جا رہا ہے۔
آئی ایس پی آر نے یہ بھی کہا کہ یہ انصاف نفرت، جھوٹ اور تقسیم کے بیانیے کو رد کرتا ہے اور پاکستان کے آئین اور قانون کی بالادستی کو اجاگر کرتا ہے۔ سزا یافتہ مجرموں کے پاس اپیل اور دیگر قانونی چارہ جوئی کا حق محفوظ ہے۔ یہ فیصلہ ایک اہم سنگ میل ہے جس سے ریاست کی عملداری کو مزید مستحکم کیا جائے گا اور سیاسی دہشتگردی کو روکا جائے گا۔
پاکستان میں اگلے سال ہونے والی آئی سی سی چیمپئنز ٹرافی کا شیڈول منظر عام پر
