کوئٹہ ( نیوز ڈیسک )بلوچستان کے بیشتر علاقوں میں بارشوں کی تباہ کاریاں جاری، جس کے باعث انفراسٹرکچر کو شدید نقصان پہنچا، سینکڑوں بے گھر ہوئے، اور مزید تین افراد کی جانیں گئیں، جس سے ہلاکتوں کی مجموعی تعداد 33 ہوگئی۔
صوبہ بھر میں موسلا دھار بارشوں کے بعد زیارت، قلعہ سیف اللہ، خضدار، لورالائی، جھل مگسی، سبی، جعفرآباد، نصیر آباد، لسبیلہ اور بولان سمیت اضلاع کے نشیبی علاقے زیر آب آ گئے۔
صوبائی حکومت نے جھل مگسی کو آفت زدہ علاقہ قرار دیا ہے، اس فہرست میں پہلے ہی قلات، زیارت، سبط پور، لسبیلہ، آواران، جعفرآباد، اوستہ محمد، لورالائی اور چاغی شامل ہیں۔موسلادھار بارش نے کئی اضلاع میں موبائل فون، انٹرنیٹ اور بجلی کی خدمات متاثر کر دی ہیں۔ حکام بالا علاقوں میں مواصلات کو برقرار رکھنے کے لیے لیویز کا وائرلیس سسٹم استعمال کر رہے ہیں۔
چمن، قلعہ عبداللہ، قلعہ سیف اللہ اور زیارت میں سیلاب نے باغات اور فصلوں کو نقصان پہنچایا۔ ان اضلاع میں کئی کلومیٹر سڑکیں، پل اور متعدد مکانات بہہ گئے ہیں۔حکومتی کنٹرول روم کے مطابق قلعہ عبداللہ اور قلعہ سیف اللہ میں سینکڑوں لوگ کھلے میں پھنسے ہوئے ہیں۔
حالیہ بارشوں نے مزید تین افراد کی جانیں بھی لے لی ہیں۔پراونشل ڈیزاسٹر مینجمنٹ اتھارٹی (PDMA) کی رپورٹ کے مطابق یکم جولائی سے اب تک 13 بچوں سمیت 33 افراد بارشوں کی وجہ سے ہلاک ہو چکے ہیں۔ مزید 15 افراد زخمی ہوئے ہیں جن میں 11 بچے بھی شامل ہیں۔
بارشوں نے 558 مکانات کو مکمل طور پر تباہ کر دیا ہے اور 13,986 دیگر کو جزوی طور پر نقصان پہنچا ہے جس سے کل 109,903 افراد متاثر ہوئے ہیں۔زرعی نقصانات نمایاں ہیں، شدید بارشوں سے 58,799 ایکڑ فصلیں تباہ ہو گئیں۔ سیلابی پانی نے 373 مویشیوں کی جانیں بھی لے لی ہیں۔ قومی شاہراہ پر سات پلوں کو بھی نقصان پہنچا ہے۔
مزید پڑھیں: پاکستان میں منکی پاکس کا چوتھا کیس سامنے آگیا
