اسلام آباد(نیوزڈیسک)پاکستان تحریک انصاف کے سابق رہنما فیصل واؤڈا نے کہا ہے کہ عمران خان کے ساتھ کچھ نارواسلوک نہیں ہوا،عمران خان کیساتھ موجود پی ٹی آئی کے رہنما بیرون ممالک ایجنسی سے رابطوں میں ہیں، وہی عمران خان کو ہٹاکر وزیراعظم بننا چاہتے ہیں، کچھ گیمر لوگ اپنی گرفتاریاں خود کروارہے ہیں۔نیشنل پریس کلب میں پر یس کانفرنس کرتے ہوئے فیصل واوڈا نے کہا کہ وقت آگیا ہے پاکستان کے ساتھ کھڑے ہونے کی ضرورت ہے سب مسائل سے زیادہ ہمیں اپنا ملک عزیز ہونا چاہیے، ملک ہماری ماں ہے ہم اس کے لیے مریں تو سمجھ آتی ہے، آج دونوں طرف پاکستانی ہیں پی ٹی آئی، پولیس، فوج ہمارے بچے ہیں ہم ناراضگی میں دشمن کو خوش کررہے ہیں۔فیصل واوڈا نے کہا بھارت اسکا بھر پور فائدہ اٹھا رہا ہے، بھارتی سرکار کو پتہ ہونا چاہیے ملکی سلامتی کے لیے سب ایک ہیں، ہم اختلافات میں دشمن کے خواب کو تعبیر دے رہے ہیں ہم نے عمران خان کی لیڈر شپ سے بہت کچھ سیکھا سمجھا ہے، پی ٹی آئی لیڈر شپ نے مجھ پر بھروسہ کیا، نیوٹرل پلیٹ فارم سے بات کررہا ہوں جو عمران خان سے پیار کرتے ہیں ان نوجوانوں سے مخاطب ہوں سب سے پہلے پاکستان، پاکستان ہے تو ہم ہیں۔انہوں نے کہا کہ کور کمانڈرز نے احتجاجی بچوں کو اپنی اولاد سمجھا، کور کمانڈرزنے بردباری کا مظاہرہ کیا، انہوں نے ملک کو بڑی تباہی سے بچانے کے لیے گولی کا آرڈر نہیں دیا، قوم جانے گی پہچانے گی ملک میں کون سازش کررہا ہے، عوام سے گزارش کرتا ہوں صبرو تحمل کا مظاہرہ کریں، ہمارے ساتھ جو احتجاج کررہے ہیں وہ پرامن رہیں۔فیصل واؤڈا نے کہا عمران خان کے ساتھ کچھ نارواسلوک نہیں ہوا، پاکستان کے لیے مجھے عدلیہ، اسٹبلشمنٹ، وکلاء حکومت جس کے پاس جانا پڑا جاؤں گا، ہمارے پوری کوشش ہوگی ملک کو بچایا جائے، ملک میں پہلے معاشی حالات خراب ہیں ہم اپنے جذبات سے اپنے ملک کا نقصان کررہے ہیں، ہماری جذباتی قوم ہے، ہم نے جذبات سے انڈیا کو جنگوں میں منہ توڑ جواب دیے۔
